JKNS deka majak munaska penyakit denggi - Berita Iban Online

Header Ads

  • Baru Nyadi

    JKNS deka majak munaska penyakit denggi

    PUNASKA DENGGI: Dr. Sim (tengah) begambar enggau penyereta program beripai munaska denggi di Palan Komersil Demak Laut ditu, kemari.
    Taja tu ukai baru tang agi mayuh orang enggai kiruh nagang pengelekai penyakit tu.

    KUCHING: Perintah Nengeri nengah Opis Pengerai Nengeri Sarawak (JKNS) majakka pengawa sida ngemunaska penyakit denggi.

    Menteri Kaunsil Kandang Menua enggau Pengawa Berumah, Datuk Dr Sim Kui Hian madah, penyakit sakit denggi ukai penyakit ke baru.

    Taja pan, mensia mayuh nemu pasal penyakit tu ke tau naban nyawa, tang mayuh agi enggai kiruh nagang penyakit tu ari ke nyadi.

    “Perintah udah bejalaika mayuh pengawa dikena ngemunaska denggi, baka bejalaika operasi meresa palan ngaga rumah, ngemunas sereta bebuaika uras ke ditikau sengapa kelebih agi ba endur penyadi kes enggau penyakit denggi.

    “Taja pia, ni naka pemendar ngemunaska denggi tu digaga, enda ulih nyapai pemerat tuju ke batang, enti komuniti tauka mensia mayuh enggai kiruh,” ku iya.

    Dr. Sim madah munyi nya lebuh bejaku ngepunka atur pengawa ‘Gotong Royong Mega Peringkat Negeri Sarawak 2017’ di palan Komersial Demak Laut ditu, kemari.

    Sama bisi ngulu pengawa nya, Sapit Direktor Opis Pengerai Sarawak (Pengerai Mensia Mayuh) Dr Nordin Salleh ke ngarika Direktor Opis Pengerai Menua, Dr Jamilah Hashim.

    Program beripai nya sebagi ari siri kedua digaga taun tu ngemunaska Aedes, ti digaga ulih Opis Pengerai (JKNS) begulai enggau Opis Pengerai Pelilih Menua Kuching enggau Opis Resden Pelilih Menua Kuching.

    Ba lansa bukai, ripot bekait enggau sakit denggi bepun ari 1 Januari ngagai 10 Disember 2017 mandangka kes nya bisi udah kurang dibanding enggau 2,639 kes ke timpuh ke sebaka dalam taun 2016.

    Taja pia, bisi 10 iti kes di pelilih menua, kes ke bisi nambah lebih 5 kes di banding dalam timpuh ke sebaka dalam taun 2016, iya nya di Bau (24 kes), Betong (22 kes), Serian (21 kes), Saratok (14 kes), Lawas (11 kes), Lundu (9 kes), Pakan (7 kes) Selangau (6 kes) enggau Tatau (5 kes).

    Baka di sitak Palan Komersil Demak Laut, sitak nya kala dikelai nyadi sitak ‘hotspot’ sakit Denggi dalam taun 2016, ke mungkur 18 kes enggau timpuh nguntrul penyakit nya ari berampit dalam kandang 54 hari.

    Dalam taun tu mega (2017), sitak Palan Komersil Demak Laut sekali agi dikelai nyadi sitak ke agi mengkang napi penyakit sakit denggi, tang ke sekali tu, empat iti kes bisi ditemu tang taja pia, agi ulih di kuntrul. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads