Ketuai komuniti dilalau bejalaika pengawa enggau lurus - Berita Iban Online

Header Ads

  • Baru Nyadi

    Ketuai komuniti dilalau bejalaika pengawa enggau lurus

    TERIMA KASIH: SAO Reagan Edwin nerima tepa ari Penguang laban udah nyadi fasilitator kus.
    MARUDI: Ketuai komuniti, tuai rumah sereta kaban Komiti Pemansang enggau Pengelikun Genturung Pendiau (JKKK) di menua tu meseti megai tanggungpengawa enggau komited sereta nemu ngatur nembiak redak sida, bejalaika pengawa enggau enda bechiping sereta lurus lebuh nyadi ketuai.

    “Pengudah kita dipilih, tentuka kita semampai ingatka sapa ti milih kita nyadi ketuai laban sida bisi pengandal ba penau kita nyadi ketuai, tentuka kita bejalaika tanggungpengawa ti menyana sereta meseti meruan.

    “Sekali kitai nyadi ketuai, semua mata deka meratika kita laban ketuai komuniti mih ti nyadi teladan. Jaga memanah ulah enggau pejalai kita, rayat deka berati sereta ngemata.

    “Aku enggai mendingka berita ti enda menuku baka mabuk, bejudi lalu aku ngarapka pekara tu nadai nyadi ngagai semua ketuai ke baru dichiri,” ku Menteri Muda Kaunsil Kandang Menua, Datu Dr Penguang Manggil lebuh bejaku ba Pengawa Nutup Kus Nyadi Ketuai ungkup komuniti Melayu di N.76 Marudi ti udah diatur di Palan Sivik Baram ditu, kemari.

    Kus tu udah digulu urung 77 iku pesereta iya nya ari bala ketuai komuniti Melayu sereta kaban JKKK di kandang menua nya.

    Datu Dr Penguang ke nyadi Kaban Kunsil Nengeri (ADUN) Marudi ngelalau bala pesereta ngambi beratka runding enggau ngaul diri enggau genturung pendiau tauka rumah panjai ke bukai.

    Pekara tu beguna endar pengudah semua kita mendingka penerang ari mayuh bengkah ejensi perintah lalu kita meseti megai tanggungpengawa diri. Bejalaika pengawa enggau runding kita ba pekara ke patut digaga begulai ti ulih mai pemansang di Pelilih Marudi.

    Iya mega ngelalau baka Ketuai Genturung Pendiau meseti nyediaka profile genturung pendiau tauka rumah panjai sereta nulis semua nama ketuai ruang bilik enggau penerang pelajar nembiak redak sida, laban mayuh sida udah graduet sereta penerang bekaul ke bukai.

    Ngelansa pekara bekaul enggau Pengawa Bepilih Besai Ke-14 (PRU14) ti deka diatur sebarang maya, iya ngelalau kaban JKKK bejalaika tanggungpengawa sida maya ngundi sereta meseti gawa rat begulai enggau chalun Barisan Nasional (BN).

    Bala ke sama bisi bejaku iya nya Pemesai Pelilih Marudi Mackos Sibong enggau Chairman Pengatur Penghulu Haji Edrews Abdul Ghapar.

    Sama bisi datai DSP Gabriel Risut, Injinir JKR Faizol Hassim sereta SAO Reagan Edwin enggau SAO Nancy Abau. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads