KPDNKK enggau ATM bekerejasama ngemuntan pengawa belalai mai barang subsidi meraka garis antarabansa - Berita Iban Online

Header Ads

  • Baru Nyadi

    KPDNKK enggau ATM bekerejasama ngemuntan pengawa belalai mai barang subsidi meraka garis antarabansa

    Koperasi enggau Pekara Bebeli Barang (KPDNKK)
    KUCHING: Opis Menteri Dagang Dalam Nengeri, Koperasi enggau Pekara Bebeli Barang (KPDNKK) nempa kerejasama enggau raban Soldadu Malaysia (ATM) ba pengawa nyaga sereta ngemuntan pengawa belalai mai barang ke dijaga perintah tauka barang subsidi meraka garis antarabansa.

    Direktor Penerit Adat, Bagi Penerit Adat KPDNKK, Datuk Mohd Roslan Mahayudin madahka kerejasama nya dipejalaika nengah Strategi Lautan Biru Kebangsaan (NBOS) ke nyadi inisiatif perintah ngelangkar polisi enggau ‘perkongsian pintar’ entara opis menteri enggau ejensi.

    Iya madahka kerejasama opis menteri nya enggau ATM amat beguna laban raban nya ke endang be­jalaika pengawa nyaga ba garis menua enggau antarabansa dibandingka enggau KPDNKK.

    “Aku ngarika KPDNKK beterima kasih ngagai ATM laban ke udah meri kere­jasama enggau kami.

    “Sida (ATM) ke nyaga ba garis antarabansa tauka menua ti ngelala sereta ngerampas barang subsidi tauka barang ke dijaga perintah nyema ditemu dibai meraka garis antarabansa tauka menua, udah nya diserahka ngagai KPDNKK.

    “Mayuh kes ke udah di­terima kami (KPDNKK) ari ejensi bukai nyengkaum ATM. Ari piak ATM aja di serata menua ba taun 2016 udah nyerahka 11 kes ti be­rega RM44,836.60 enggau ba taun 2017 bisi 10 kes ti berega RM39,213, ke alai penyampau semua kes ke diserahka ATM ngagai KP­DNKK bisi 21 kes ti berega RM84,049.60,” ku iya.

    Roslan mansutka pekara nya dalam aum pengarang berita pengudah bejadika ‘Taklimat Perundangan dan Akta-Akta Yang Dikuatkua­sakan’ ari Bagi Penerit Adat KPDNKK ngagai Pemesai enggau Raban ATM, ke dia­tur ba Dewan Bukavu, Kem Penrissen ditu, kemari.

    Nambahka nya, dalam aum pengarang berita ke sama Ketuai Pemesai Penerit Adat tauka Atur Opis Dagang Dalam Nengeri, Koperasi enggau Pekara Bebeli Barang (PPDNKK) Sarawak Ab­dul Hafidz Abdul Rahim madahka penyampau kes ti diserahka ejensi luar ngagai PPDNKK Sarawak dalam timpuh dua taun tu bisi ngayanka pengusut.

    Berebak enggau tu Hafidz di Sarawak PPDNK bisi nganjung pemesai ba pos pengelikun dikena nagang pengawa mai barang subsidi tauka barang dijaga perintah ke menua luar.

    “Nengah NBOS tu, kitai berati bisi ngayanka pen­gusut ba penyampau kes ke diserahka ejensi bukai ngagai KPDNKK.Enti dalam taun 2016 kitai bisi nerima 15 kes ti berega sepenyampau RM8,597,579.48 diband­ingka enggau taun 2017 bisi lima kes ti berega sepenyam­pau RM810,111.80.

    “Ke diatu dikena ngepun kitai mega bisi nganjung pemesai kitai ba pos penge­likun Serikin lalu bisi diatur dipejalaika dikena ngemu­ntaka pengawa mai belalai barang subsidi pansut ari menua tu,” ku Hafidz.

    Nengah NBOS, KPDNKK nempa kerejasama enggau baka ejensi APMM, PDRM, PGA, PPM, Kastam enggau ejensi ke bukai kelimpah ari ATM.

    Kelimpah ari nya lebuh bejaku ba pengawa bejadika licha nya, Roslan madahka tuju kerejasama NBOS nya awakka ulih mantu pegawai penerit adat KPDNKK be­jalaika pengawa matau eng­gau operasyen senipak eng­gau penyampau premis ke majak nambah dibandingka enggau pemayuh penyampau pegawai opis menteri nya.

    Ku Roslan, KPDNKK baum enggau ATM kena 29 Mei 2017 ti bechairmanka Dato Sri Jamil Salleh, Ketuai Sekretari KPDNKK berand­auka pasal skop kerejasama NBOS.

    “Skop kerejasama ti dipe­setuju mungkur pekara baka latih pasal undang-undang ke dipejalaika KPDNKK; kerejsama enggau bantu ari segi bekunsi penerang pansik; kerejasama eng­gau bantu ari segi nyaga ba garis antarabansa darat enggau ngerejista raban ATM nyadi kaban ‘Friends of KPDNKK’ (FOK) sereta mantu meri penerang,” ku Roslan.

    Sama bisi datia ba pengera­mi enggau aum pengarang berita nya kemari, Pan­glima Briged Ke3 Infrantri Malaysia Brigedier Jeneral Muhammad Bustaman Mat Zin enggau ke bukai. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads