Lebih 800 iku nama pesalah makai suap ayan ba laman web SPRM - Berita Iban Online

Header Ads

  • Baru Nyadi

    Lebih 800 iku nama pesalah makai suap ayan ba laman web SPRM

    Logo Penagang Makai Suap Malaysia (SPRM)
    MIRI: Pengawa numbuhka pangkalan data pesalah makai suap ba laman web Opis Penagang Makai Suap Malaysia (SPRM) mujur ngerintaika urung 800 iku orang ke salah makai suap.

    Penumbuh pengkalan data nya endang sebengkah ari japai inisiatif SPRM dalam bebendar ngemunaska penyalah makai suap.

    Direktor SPRM Sarawak, Datuk Badrul Shah Norman madah, mayuh bengkah inisiatif agi benung dipejalai nyengkaum atur betukar kereja ungkup orang sereta penuduk pengawa ke diasai nyadi ‘Tumpuk Angat’.

    “Berebak enggau nya, SPRM ngelancharka siti agi kimpin munaska penyalah makai suap dikumbai 3J iya nya ‘Jangan Hulur, Jangan Kawtim dan Jangan Settle’.

    “Tuju kimpin nya dikena meri penyedar ngagai mensia mayuh ngambi enda teparuk enggau penyalah makai suap nengah chara nerima tauka meri suap,” ku iya.

    Iya madah munyi nya rambau Pengerami Nyain Sempekat Beresi Ari Makai Suap (IBR) Ungkup Pemesai enggau Staf Opis Pemansang Ikan Malaysia (LKIM) Wilayah III Miri ditu kemari.

    Teks jaku iya dibacha pengari iya, Penguasa SPRM Pampang Miri, Ayahtullah Abdula Humair.

    Bela bisi datai Direktor Unit Integriti LKIM Azmi Othman, Pemantu Pemesai Kanan Unit Integriti LKIM, Noorazmi Md Ariffin enggau Pemesai LKIM Wilayah III Miri, Saliah Mudin.

    Kelimpah nya, iya mega meri besai terima kasih ngagai pengatur pengawa LKIM Wilayah III Miri laban udah nyaut kangau SPRM berundingka  inisiatif nyain IBR.

    Kenu ku iya, inisiatif nya mandangka pengeransing LKIM Wilayah III Miri mantu SPRM dalam ngelaban penyalah makai suap.

    “Kitai enggai meda servis perintah dikamah enggau ulah makai suap sereta pemesai senior dipeda idup senang ngelui ari penatai pemisi diri sereta ngumpul laban nengah ulah makai suap tau bendar ngenyaika nama orang gawa perintah.

    “Kitai patut besaup tulang nentuka genap pengawa ke digaga kitai meri pemaik ngagai diri empu, komuniti enggau menua. Arapka pengawa kitai ngelaban penyalah makai suap nya di Malausia mujur,” ku iya,

    Ba pengerami nya urung 43 iku pemesai enggau staf  LKIM Zon III Miri ngangkat sumpag IBR diuluka Pemesai LKIM Wilayah III, Saliah Mudin. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads