Header Ads

  • Berita Tebaru

    Lebih ari 10,000 iku disadang ngulu Pengawa Bejalai Bebala Mayuh Krismas Kuching

    ARAM SAMPAL DATAI: Ting (rintai mua, kiba) begulai enggau kaban komiti pengatur megai kain rentang ‘Kuching Christmas Parade’ ti deka diatur Hari Enam tu. Sama bisi dipeda Ambrose (rintai mua, tiga kanan).
    KUCHING: Lebih ari 10,000 iku disadang ngulu Pengawa Bejalai Bebala Mayuh Krismas Kuching, pengerami ba jalai pemadu besai enggau richah, deka diatur kena Hari Enam tu, berengkah ari pukul 6 lemai.

    Taun tu, pengawa tu diatur Serakup Gerija-Gerija di Sarawak (ACS) ke alai Gerija Methodist SCAC dipilih nyadi gerija pengatur besai, lalu disaup Raban Gerija Kuching ke bukai.

    Chairperson Pengatur, William Ting madahka rambai jaku ungkup pengawa bejalai bebala mayuh Krismas taun tu iya nya ‘Hope in Jesus Christ’ baka sida ngarapka diri deka ngemai pengarap ti meruan ngagai peranak di Kuching dalam semua pemar ti ditapi.

    “Tuju iya deka ngerembaika reti Krismas ke bendar ti deka ngemai pengasih enggau pengelantang ngagai peranak di Kuching,” ku iya madah rambau aum pengarang berita kemari.

    Semua bala kaban ti bejalai dilalau ngambika begempuru ba MBKS Jubilee Ground (besepiak enggau Sekula Primari Chung Hua No. 3) urung pukul 6 lemai.

    “Jaku puji enggau sembiang minta berekat deka berengkah urung pukul 6.30 lemai, pengawa bejalai deka berengkah urung pukul 7 lemai lalu pemeri deka disadung ngagai mensia mayuh urung pukul 8 malam di sepemanjai sida ke bejalai. Kesemua pejalai dipelaba deka tembu sejam setengah,” ku iya nerang.

    Pejalai deka berengkah ari Jubilee Ground napatka HSBC roundabout - Jalai Padungan - Jalai Tun Abdul Rahim (Tebing Sungai) - Lebuh Temple (Hotel Harbour View) - Lebuh Wayang (Star Cineplex) - Jalai Tabuan (Ting & Ting Supermarket enggau Hotel Borneo) - Jalai Ban Hock (Hotel Grand Continental enggau Flat MBKS) – lalu nikal baru ngagai Jubilee Ground.

    Gerija Kristian Kuching, ku iya nambah, deka nganjung lebih ari 7,000 iku raban orang Kristian ngaul diri ba pejalai bebala mayuh tu.

    “Batang pengerami iya nya karoling Krismas ti ngaul lebih ari 7,000 iku, 15 Christmas floats, lapan raban band muzik, pengawa mandangka pekayan enggau pemerindang ba jalai,” ku iya nerang silik.

    Raban gerija ti bisi nyereta iya nya Gerija Roman Katolik, Gerija Anglikan, Gerija Methodist SCAC, Gerija Methodist SIAC, Gerija Sidang Injil Borneo BEM (SIB), The Gerija Seventh-Day Adventist, The Salvation Army, Gerija Baptist Sarawak, Blessed Church, Gerija Hope Kuching, Calvary Family Church, Gerija Grace Sentral (AOG), GIS Gospel Harvest Kuching, Sarawak Grace Church, Good News Fellowship, City Harvest Church, Fellowship of Evangelical Students (FES) enggau Latter Rain Church Kuching.

    Sekretari Besai ACS, Elder Ambrose Linang nesau semua raban orang Kristian enggau ukai Kristian nyereta pengawa bejalai bebala mayuh sereta berami ngintu Krismas dalam pengelantang.

    Mensia mayuh dilalau ngambika bejimat lebuhka deriba sereta nyaga pengelikunndiri kena Hari Enam tu laban jalai ke disebut ba atas tadi deka dikena berengkah ari pukul 7 lemai nyentuk pukul 9 malam, ke alai jalai besemak MBKS Jubilee Ground deka ditutup ngagai trafik berengkah ari pukul 5 lemai nyentuk pukul 10 malam.

    Mensia mayuh diperansang sampal datai meda pengawa bejalai bebala mayuh sereta bela berami ngintu Krismas di sepemanjai jalai ke bisi ditengah. #UtusanBorneo

    No comments

    Post Top Ad