Lima iku peranak ari menua China , Indonesia ditangkap ketegal nipu - Berita Iban Online

Header Ads

  • Baru Nyadi

    Lima iku peranak ari menua China , Indonesia ditangkap ketegal nipu

    Merbin Lisa
    PADAWAN: Lima iku peranak menua luar ari China enggau Indonesia ti nipu duit enggau barang emas siku  indu ,58, di Pasar Siburan ditangkap polis kena 13 Disember tu tadi.

    Digelar Sindiket ‘Bomoh Antarabangsa’, sida ditangkap Bagi Tasat Pengawa Jai Komersial (BSJK) Indu Opis Pelilih (IPD) Padawan pengudah ripot digaga indu ke ditipu nya urung pukul 12 tengahari, hari ke sama.

    Sapit Ketuai Polis Daerah DSP Merbin Lisa madah, sida lima ditangkap ba sebuah rumah di Taman Stampin Tengah urung jam 5 lemai, iya nya empat jam pengudah polis nerima ripot.

    Nitihka penerang Merbin, indu ke ditipu ngeripot sindiket nya nyadi kena 11 Disember di Pasar Siburan ke alai siku ari sida madahka diri ‘bomoh’ sereta madah ruang bilik indu nya deka ditinggang penusah.

    Ku suspek, anak  indu ke ditipu nya deka dituntung penusah bebadi ba jalai alun sehari nya lalu suspek ulih mantu nyeliah penusah nya nyadi enti dibayar.

    “Suspek udah nya minta indu ke ditipu nyerahka semua emas sereta semua duit dalam bank ke tuju nya.

    “Pengudah semua ke dipinta diberi  indu ke ditipu ti diengkah dalam siti plastik, iya lalu diberi siti agi plastik sebaka enggau plastik ke diguna endur nyimpan emas enggau duit indu ke ditipu.

    “Indu ke ditipu udah nya lalu ditinggal sereta dipadah semina ulih muka plastik nya pengudah tiga hari,”ku iya.

    Pengudah tiga hari, indu ke ditipu lalu muka bungkus nya sereta tekenyit meda emas enggau duit iya udah bebali nyadi butul ai mineral enggau surat kabar ti ngujungka iya lalu ngaga ripot polis.

    “Pengudah nerima ripot, raban polis lalu ngaga operasyen ngiga, ke alai semua suspek udah nya mujur ditangkap ba sebuah rumah dalam timpuh empat jam aja.

    “Kelimpah ari nya, polis mega bisi tetemuka barang emas indu ke ditipu ti dilalai ba baruh lachi siti jemari,”ku Merbin.

    Dalam rumah nya mega polis tetemuka duit RM6,618, Rupiah Indonesia(RP.)1,760,000, Hong Kong Dollar 610, Yuan China 1,150 enggau Brunei Dollar 2.

    Dua pasport Indonesia, tiga paspot China sereta 8 iti telefon binching bemacham chap bisi dirampas.

    Bela dirampas sebuah entuka ke disuwa sindiket nya ari sebuah kompeni di Kota Samarahan ke alai penyampau pengerugi  indu ke ditipu manggai RM14,000.

    Semua suspek beumur 27 nyentuk 52 taun ditan sereta diriman nyentuk 18 Disember ngambi pansik ulih dipejalai nengah Seksyen 420 Kanun Keseksaan.

    Merbin nambah, sindiket nya masuk ke Sarawak kena 5 enggau 6 Disember tu tadi lalu dipelaba bisi kaul enggau siti kes nipu ke nyadi di Batu Kawa.

    Sindiket ku Merbin, nagit orang ke udah lunggar umur sereta diau kediri. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads