Header Ads

  • Berita Tebaru

    MA63: Pekara ke udah diturai dalam sempekat patut dititih, enda ulih diubah

    IDUP PBB: Abang Johari (tiga ari kanan) bejadika Pengawa Bejadi Aum Bala Pengari Pampang PBB, kemari.
    SIBU: Parti Pesaka Bumi­putera Bersatu (PBB) deka negika hak Sarawak baka ti udah diturai di dalam Sem­pekat Malaysia 1963 (MA63) ngambika iya meruan ‘manis’ baka ti udah disempekat.

    Kepala Menteri Datuk Patinggi Abang Johari Tun Openg nyemetak madah­ka MA63 nyadi sempekat antarabansa ti enda ulih diu­bah sebarang piak.

    “Kitai semina deka ngambi pulai kuasa ti udah lenyau. Taja pia, aku enda ngaga sepeneka ati dalam nagih hak Sarawak.

    “Aku nganjung tim luyar ngagai London ngambika ki­tai bisi fakta, ukai bepelasarka asai ati aja, tang belalauka fakta ke bisi diturai dalam Sempekat Malaysia 1963.

    “Kitai ukai deka ngemana, minta dikasih, ukai pia. Pekara ti udah dipekat, tu undang-undang iya lalu en­dang patut dipulaika ngagai Sarawak,” ku iya nyemetak madah.

    Iya ke mega Presiden PBB mansutka jaku nya lebuh bejaku bejadika Pengawa Bejadi Aum Bala Pengari Pampang PBB Pakan, Me­luan, Ngemah, Machan, Tamin, Pelagus, Katibas, Bukit Goram enggau Baleh di sebengkah hotel tebilang, ditu kemari.

    Nitih ku Abang Johari, leb­uhka di London, tim luyar ti diketuaika Menteri Muda ba Opis Kepala Menteri (Un­dang-undang, Kaul Sarawak enggau Perintah Besai sereta Matau Projek), Sharifah Hasi­dah Sayeed Aman Ghazali tetemuka dokumen ti dikena rambau jeman dipegai perin­tah menua luar.

    Ku iya, semua dokumen udah dibai ngagai London pengudah Sarawak nyapai merdeka dalam taun 1963. Nya kebuah, Kepala Menteri Sarawak ti keterubah, Tan Sri Stephen Kalong Ningkan nadeai ngembuan salin doku­men nya ti diklasifikasyen resia.

    “Nya alai, kitai deka nge­mai pulai baru dokumen tu ngagai Kuching ngambika iya diempu peranak Sarawak,” ku iya.

    Ku iya nambah, dokumen tu deka dibantai ba Putra­jaya nyadika bukti dikena ngenukuka hak Sarawak.

    Berebak enggau nya iya mega nibak jaku Tun Datuk Patinggi Tan Sri Temeng­gung Jugah Barieng ke alai iya enggaika MA63 tu munyika sempema baka tebu, manis ba pun tang pengujung deka tabar.

    “Apai Jugah suba kala nyebut, anang sesekali nejuka Malaysia baka tebu, manis ba pun tang pengujung iya tabar.

    “Pengawa ti digaga kitai nyangka udah berengkah masam, tentu asai iya deka pait. Kitai enggaika pait asai. Nya kebuah kitai deka negika iya ngambika meruan manis baka ti udah disempekat,” ku iya.

    Ba lansa ke bukai, rambau aum pengarang berita, iya ngansak raban PBB ngambika bejalaika pangku pengawa mantu meri penerang ngagai rayat menua pesisir bekaul enggau polisi perintah ke­maya hari.

    Ku iya, perintah udah ngelancharka chara baru nge­mansangka ekonomi menua nengah ekonomi digital.

    “Kitai ngalihka kuing ari ekonomi konvensional nga­gai ekonomi digital. Kitai mega udah ngagihka belanja ungkup pengawa ngangkat­manahka infrastruktur. Pen­gudah semua tembu dalam timpuh dua taun, reti iya kitai patut nyediaka diri ngena teknologi nyengkaum sektor betanam betupi,” ku iya.

    Bekaul enggau isu ‘Pulau Galau’ enggau ‘Pemakai Menoa’, ku iya, sebengkah aum besai deka ngaul bala ketuai komuniti deka diatur dalam bulan Januari taun baru.

    “Kitai udah mantai rambau Aum Kunsil Nengeri (DUN) apin lama ke udah, ke alai kitai deka ngubah kod tanah dalam bulan Mei pengudah kitai mutarka pekara nyengkaum definisyen ‘Pulau Galau’,” ku iya.

    Sama bisi datai Sapit Kepala Menteri Datuk Amar Doug­las Uggah Embas enggau Ketuai Nembiak PBB Datuk Seri Fadillah Yusuf, Sapit Menteri Pemansang Menua Pesisir enggau Kandang Menua, Datuk Alexander Nanta Linggi sereta Menteri Muda Pelajar enggau Pan­sik Teknologi Dr Annuar Rapa’ee. #UtusanBorneo

    No comments

    Post Top Ad