MA63: Pengeran nagih hak ukai reti deka nyerara diri - Berita Iban Online

Header Ads

  • Baru Nyadi

    MA63: Pengeran nagih hak ukai reti deka nyerara diri

    BEJADI: Awang Tengah malu ‘beduk’ tujuh kali kelai bejadika Mesyuarat Perwakilan Parti PBB Cawangan N.7 Samariang Sesi 2017-2020, seraya diperatika (ari kiba) Khalid enggau Hasidah sereta (ari kanan) Dr Annuar enggau Asfia, kemari. — Gambar Muhd Rais Sanusi
    Hak Sarawak ti majak lenyau deka diambi pulai awak ulih meri pemaik ngagai rayat enggau nengeri: Awg Tengah

    SANTUBONG: Pengeran Perintah Nengeri ti deka nagih hak Sarawak baka ke ditulis dalam Sempekat Malaysia 1963 (MA63), ukai reti deka nyerara diri ari Malaysia.

    Tang ku Sapit Kepala Menteri Datuk Amar Awang Tengah Ali Hassan, nya dikena ngenukuka hak Sarawak ti majak lenyau deka diambi pulai awak ulih meri pemaik ngagai rayat enggau nengeri.

    Berindik ari pekara nya Awang Tengah meransang sereta ngingatka semua kaban Parti Pesaka Bumiputera Bersatu (PBB) lebih agi rayat nengeri tu terus meri sukung ngagai Kepala Menteri Datuk Patinggi Abang Johari Tun Openg neruska pengawa ke udah dipungkal niang Pehin Sri Adenan Satem bekaul enggau MA63.

    “Nya kebuah Abang Johari nganjung tim Hasidah mansik dokumen (bekaul MA63) ke London ngambika lebuh maya berunding (enggau perintah besai) kitai bepelasarka fakta.

    “Aku mega bisi dibai Abang Johari beratika dokumen nya, chukup mayuh bukti ngayanka nama ke patut diempu kitai udah lenyau, tu meh ti deka ditagih Abang Johari lalu kitai patut nyukung iya. Nya hak kitai, bepelasarka MA63.

    “Menteri Besai (Datuk Seri Najib Tun Razak) mega madahka hak ke udah lenyau nya deka diberi pulai ngagai kitai. Nya alai kitai arap bendar (ulih diputarka) ngena chara berunding.

    “Tang nya ukai reti kitai deka nyerara diri, enda. Nyema bisi raban orang ti baka ke bisi ati deka nyerara (enggau Malaysia) nya chukup sinu,” ku iya.

    Awang Tengah ti mega Pemangku Timbalan Presiden PBB mansutka pekara nya lebuh bejadika Aum Delegit Parti PBB Pampang N.7 Samariang Sesi 2017-2020 ke diatur ba Dewan Sunset, Damai Beach Resort ditu, kemari.

    “Tang nyema raban nya tetap ngagai nama utai ke digaga perintah nengari ti deka nagih hak baka dalam MA63 sereta bepelasarka undang-undang, nya pekara ti manah,” ku iya.

    Bejaku baru iya madahka Sarawak deka terus dalam Malaysia baka ke udah kala disebut niang Pehin Sri Adenan Satem iya nya kitai enggau numbuhka Malaysia, kitai dalam Malaysia lalu kitai deka selama iya dalam Malaysia.

    “Abang Johari lebuh ke nyimpul jurai maya baum kunsil nengeri apin lama madahka diri deka terus negika hak bepelasarka MA63 enggau undang-undang lalu deka terus dalam Malaysia,” ku iya ti mega Menteri Pemansang Mengeri enggau Pengeraja Asal II.

    Sama bisi datai bejadika aum nya kemari, Chairman Mendam PBB ti mega Speaker Kunsil Nengeri Datuk Amar Mohamad Asfia Awang Nassar; Ketuai PBB Pampang Samariang ti mega Menteri Muda Undang-Undang, kaul Nengeri-Perintah Besai & Pematau Projek Sharifah Hasidah Sayeed Aman Ghazali; Menteri Muda Pengawa berumah enggau Pengerai Mensia Mayuh Dr Annuar Rapaee sereta Sapit Ketuai PBB Pampang Samariang Tan Sri Datuk Seri Abang Khalid Marzuki. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads