Malaysia ransing munas penyalah makai suap - Berita Iban Online

Header Ads

  • Baru Nyadi

    Malaysia ransing munas penyalah makai suap

    Dato’ Badrul Shah Norman
    MIRI: Pengeransing Malaysia ba pengawa ngemunaska penyalah makai suap nyata dipeda berindik ari juluk ti deka nyadi entara 30 menua ke bisi dalam lis skor Indeks Persepsi Rasuah (CPI) ba taun 2020.

    Direktor Komiti Nagang Pengawa Makai Suap Malaysia (SPRM) Sarawak, Timbalan Pesuruhjaya (TPj) Dato’ Badrul Shah Norman, madah ubah baru udah dipejalai ngayanka menua kitai seruran bejalaika chara, pengawa enggau strategi ti konsisten dikena nagang penyalah makai suap.

    “Sejarah pengawa ngemunaska penyalah makai suap ti udah nyadi kenyau ari bepuluh taun ke udah begunaka SPRM ngambi ngubah chara nagang enggau ngemunas penyalah makai suap ke bisi diatu, nuju siti chara baru.

    “Ukai semina SPRM patut chakah agi gawa neritka atur enggau operasyen sida, tang berebak enggau nya patut ngaul diri semak enggau komuniti, rat agi sereta ba semua pekara besai ke bukai,” ku iya.

    Iya mansutka jaku nya lebuh bejadika Pengawa Nutup Hari Anti Makai Suap Antarabansa Renggat Nengeri Sarawak 2017 di Balai Mayuh Guna, Kompleks Islam Sarawak (KIS) ditu, apin lama ke udah.

    Jaku iya dibacha pengari iya, Sapit Ketuai Mansik SPRM Sarawak Penolong Pesuruhjaya (PPj) Wan Mohamad Wan Drahman.

    Nitih ku iya, kenyau ari pun taun tu, SPRM udah bejalaika atur terit sereta operasyen ti chakah agi ke alai tetiap minggu deka bisi orang ti ditan SPRM ari pengawa ngetan tauka nuduh.

    “SPRM deka terus nambahka pengawa dikena nagang sereta nentuka sida ke salah makai suap ngambika didawa nerima ukum ti patut.

    “Kelimpah ari sukung rat rayat enggau komuniti, pengeran semua patut sebeka enggau SPRM ngambika penyalah makai suap nyadi musuh lumur satu menua,” ku iya.

    Ngelansa silik agi, ku Badrul Shah, kaul enggau sukung rayat ngagai SPRM majak ngayanka asil ari penambah tubuh kaban ‘SAHABAT Gerakan Revolusi Anti Rasuah’ (GERAH).

    “Rejista nyadi kaban nyauka manggai 100,000 iku rayat Malaysia nyadi rikot enggau bukti nyata sukung rayat ngagai pengawa SPRM.

    “GERAH nyadi peransang ubah ti deka ngemai ubah runding rayat ti begedika pengawa makai suap, bisi pengering nulak sereta enggai makai suap kelimpah berani angkat ngemunaska penyalah makai suap begulai enggau SPRM enggau nadai penangi,” ku iya.

    Berebak enggau nya, 9 Disember tetiap taun udah diakun nyadi Hari Anti Makai Suap Antarabansa ari Pertubuhan Bangsa-Bangsa Bersatu (PBB) pengudah ngemendarka Konvensyen PBB Berkenaan Pencegahan Rasuah (UNCAC) kena 31 Oktober 2003.

    Sama bisi datai Pengari Residen Miri Majenah Lass, Pemesai Pelilih Miri Abdul Aziz Mohamad Yusuf, Pengari Direktor Dewan Bahasa dan Pustaka Sarawak Abdul Rasid Subet enggau Ketuai Penulung Direktor SPRM Pampang Miri Penolong Pesuruhjaya (PPj) Othman Anyan. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads