Header Ads

  • Berita Tebaru

    Marian Guild nerima puji laban chakah bejalaika pengawa pengasih

    KAPIT: Kaban Kunsil Nengeri (ADUN) Bukit Goram, Jefferson Jamit Unyat meri puji ngagai bala kaban Marian Guild ari Gerija St Mary Immaculate Conception Kapit ti diketuaika Angelyana Lee Pui Lan, udah chakah bejalaika aktiviti jalai pengarap enggau pengawa rama sida mantu orang ti begunaka bantu di rumah panjai sereta sida ke diau di kandang mengeri enggau mengeri mit.

    “Aku gaga endar meda Marian Guild Kapit chukup chakah ba mayuh aktiviti sepemanjai taun, ukai semina mungkur kandang mengeri enggau mengeri mit aja, tang mega di rumah panjai di menua pesisir nyengkaum ngulu program ti diatur raban gerija bukai di serata nengeri, nyengkaum di Sabah.

    “Pengawa ti manah enggau chakah ngaul diri tu begunaka pengeran sereta komitmen sida empu,” ku Jamit muji.

    Ku iya, nyadi pengari rayat ti megai pengarap Kristian, iya ngasaika diri patut mantu nyediaka belanja ngambika raban Marian Guild Kapit ulih gawa sereta nampung pemanah pengawa ti ukai semina mai pemaik ngagai gerija tang mega komuniti di menua tu mega,” ku Jamit dalam jaku dipansutka iya lebuh bejadika pengerami makai lemai ti diatur raban Marian Guild ari Gerija St Mary Immaculate Conception Kapit di sebengkah restaurant di Jalai Selirik, apin lama ke udah.

    Iya muji raban Marian Guild iya nya ti nyengkaum raban nembiak enggau sida ke tuai, seraya madahka tu pengawa begulai ti bisi penyebela sereta dikearapka sida terus chakah bejalaika aktiviti jemah ungkup pemaik rayat kelebih agi raban ti begunaka bantu.

    Pia mega, iya merambu ngagai bala kaban Marian Guild ditu ngambika ngatur aktiviti baka gempuru bebaik ti tau ngaul semua pengari rayat di pelilih Kapit, begulai negutka pemanah tanggam kaul antara rayat enggau bala pengari rayat.

    Jamit mega meri terima kasih ngagai bala kaban Marian Guild ba sembiang sida, berekat enggau sukung ngujungka iya ulih menang enggau majoriti besai rambau pengawa bepilih nengeri sebedau tu seraya nambah, nya nyadika peransang ngagai iya gawaka rayat.

    Berebak enggau pengerami lemai nya, Jamit bisi ngemendarka geran penyampau RM2,000 dikena mantu raban koir Gerija Katolik ti deka ngambi bagi dalam pekit belagu koir ti deka diatur di Bintangor kena 2 Desember sereta ngemendarka RM9,000 da agi di baruh agih belanja iya ungkup taun baru, ke alai RM5,000 ngagai raban Marian Guild ari Gerija St Mary Immaculate Conception Kapit, RM1,000 ungkup raban Nembiak lalu RM3,000 da agi ungkup bala kaban Marian Guild ari Gerija St Herbert, Song.

    Chairperson pengatur ke mega chairlady Marian Guild ari Gerija St Mary Immaculate Conception Kapit, Angelyana Lee Pui Lan, meri terima kasih ngagai Jamit, ba sukung iya ngagihka belanja ngagai Marian Guild bejalaika aktiviti semanjai taun iya.

    “Nyadi gempung bejalaika pengawa pengasih, bala kaban iya datai ari orang indu ti ngintu ruang bilik aja, orang ngatika diri sereta indu ti bekereja, kami napi pemar bejalaika pengawa ketegal suntuk belanja.

    “Ba pekara tu, ngarika bala komiti pengatur enggau Marian Guild empu, aku deka mantaika pengaga ati ngagai nuan (Jamit) ti seruran nyukung ba pekara belanja, ke alai kami ulih bejalaika aktiviti ungkup gerija enggau komuniti,” ku iya.

    Paderi gerija nya, Reverend Father Matthews Olili mega bisi bejaku rambau pengerami nya meri terima kasih ngagai Jamit laban udah gerah jari ukai semina mantu ngagihka belanja ngagai gerija nya aja, tang mega ngagai gerija ke bukai, gempung ukai dikuasa perintah, kelab di menua nya sereta serakup ke bukai.

    Sama bisi datai Reverend Father David Ho ari Gerija St. Herbert Song, Chairman Parish Council, Dewis Lidek, Watson Awan, Brother Glenn, Kaunsilor Michael Nyantaw, chairlady Marian Guild (Gerija St. Herbert Song), Mina Kong, bala kaban komiti pengatur sereta bisi 60 iku temuai ke bukai.

    Antara aktiviti ti bisi dirintai dikena ngerichahka agi pengerami malam nya nyengkaum chabut tikit benasit enggau pengawa pemerindang ari bala kaban komiti pengatur. #UtusanBorneo

    No comments

    Post Top Ad