Masing udah nyuaka geran MRP ngagai 46 bengkah gerempung - Berita Iban Online

Header Ads

  • Baru Nyadi

    Masing udah nyuaka geran MRP ngagai 46 bengkah gerempung

    TERIMA KASIH: Bala penerima chek enggau Masing begambar ungkup kenang. (Duduk ari kiba) Douglas, Ugak, Masing, Elvis, Tan Kian Hoo, Freddy Bian enggau Penghulu Steward Sawing.
    KAPIT: Sapit Kepala Menteri Sarawak Tan Sri Datuk Amar Dr James Jemut Masing udah nyuaka geran aktiviti rama ngagai 46 bengkah gerempung ditu, ngalihari Hari Enam tu tadi.

    Entara bala penerima iya nya serakup, kelab lumba, institusyen pengarap, Gerempung Apai Indai enggau Pengajar (PIBG) sereta Komiti Pemansang enggau Pengelikun Genturung Pendiau (JKKK) N64 Baleh tebal agi ari Pelilih Kapit.

    Pengawa nyuaka chek udah diatur di bilik konferen Komplek Nengeri Bletih ditu.

    Sama bisi datai Kaban Parlimen (MP) Ulu Rajang Datuk Wilson Ugak Kumbong, Pemesai Pelilih Kapit Elvis Didit, Pemesai Pelilih Bukit Mabong Douglas Pungga, OCPD Kapit DsP Freddy Bian, ASP Chua Su Hua, Pemesai Pengatur Pengawa Masing Robert Liman, bala ketuai opis perintah, ketuai komuniti sereta bala penerima geran.

    Dalam jaku dipansutka iya, ku Masing, semua penyampau belanja Projek Mit Pemansang Menua Pesisir (MRP) 2017 manggai RM4.5 juta ungkup N64 Baleh.

    Bisi 320 bengkah gempung teulihka pemaik ari geran perintah nya.

    Ku iya, pengawa nyuaka chek dipejalai tiga renggat – pun taun, tengan taun enggau ujung taun.

    Renggat Keterubah (pun taun 2017) bisi 177 penerima ti ngaul penyampau RM 1,513,200.

    Renggat Kedua bisi 63 penerima sepenyampau RM 2,160,000 lalu renggat kepenudi (2 Disember 2017) bisi 80 penerima RM 422,800.

    Ku iya, renggat kepenudi bisi 46 penerima ari Kapit lalu 34 penerima ke bukai di Kuching.

    “Semua JKKK, sekula, kelab lumba enggau rekreasyen di baruh sitak N64 udah diagih enggau MRP.

    “Kelimpah ari iya empu, MP Hulu Rajang (Baleh, Belaga enggau Murum) Datuk Wilson Ugak Kumbong mega bisi ngagihka belanja ngagai sida.

    Reti iya, kelimpah ari aku empu, sida mega nerima belanja ari Ugak.

    ” Ku Masing nerang silik, mayuh endar bantu perintah lalu iya minta rayat terus nyukung perintah.

    “Penyandang P216 Ulu Rajang Datuk Wilson Ugak Kumbong deka ngetanka penuduk iya maya Pengawa Bepilih Besai Ke-14 ti deka datai.

    “Aku ngapil ngagai kita meri sukung ngagai Ugak.

    Tu ngemai pemaik ngagai sitak bepilih nengeri enggau sitak parlimen ti diarika BN, lalu kita deka nerima agih belanja ari Kaban Kunsil Nengeri (ADUN) enggau MP ti ngagihka belanja bejuta ringgit ngagai rayat.

    “Nya kebuah kitai meseti nyukung chalun BN,” ku Masing. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads