Mayuh inisiatif dipejalai ungkup pemansang ekonomi Sarawak - Berita Iban Online

Header Ads

  • Baru Nyadi

    Mayuh inisiatif dipejalai ungkup pemansang ekonomi Sarawak

    NYAUT TIMBAL PERINTAH: Nomi nerima replika cek RM1,000 ari Abang Johari (dua kiba), ke bela dikemata Abdul Aziz (kiba).
    Perintah nengeri udah numbuhka PETROS, DBOS dikena ngenegapka projek pemansang infrastruktur menua pesisir.

    KUCHING: Jeman diatu, siti jeman ke manah ungkup nengeri Sarawak laban perintah nengeri udah ngaga mayuh macham inisiatif ke pemansang ekonomi Sarawak.

    Kepala Menteri Datuk Patinggi Abang Johari Tun Openg madah entara pemerat perintah menua, iya nya betatika pemansang infrastruktur menua pesisir, Ekonomi Digital, Projek ‘Rumah Mampu Milik’, ‘Light Rail Transit’ (LRT) enggau Pemansang Sektor Industri baka pengawa betanam betupi, pelajar, pengawa dagang temuai enggau petro-kimia.

    Iya nandu baru madahka, kena nyukung inisiatif ke udah digaga tu, perintah nengeri Sarawak udah numbuhka Petroleum Sarawak berhad (PETROS) enggau Development Bank of Sarawak (DBOS).

    “Enggau penumbuh Opis Menteri Pelajar, Sains enggau Pansik Teknologi Sarawak (MESTR), pemerat deka beratika sekeda inisiatif baka ngemeratka subjek Sains, Teknologi, Injinir enggau Matematik (STEM) di renggat sekula.

    “Berindik ari nya, pelajar nyadi siti pemerat besai dalam pemansang sosio-ekonomi nengeri Sarawak.

    “Pelajar mega dikena ngenegapka Jaku English ba nembiak sekula ke mungkur sekula primari enggau sekondari, betatika pelajar di menua pesisir nyengkaum mutarka penanggul ke bekait enggau infrastruktur sekula di serata menua Sarawak, sereta ngangkatka pengawa pansik enggau inovasyen, ba nembiak sekula di renggat sekula, kolej enggau universiti,” ku iya.

    Abang Johari bejaku madah munyi tu lebuh ngemunka atur pengawa Konvokesyen PPKS/i-CATS ke-20 di Palan Konvensyen Borneo Kuching (BCCK) ditu.

    Atur pengawa konvokesyen nya bela digulu urung 896 iku nembiak PPKS/i-CATS ke nerima setipikit enggau diploma.

    Atur pengawa konvokesyen nya mega, keterubah iya digulu nembiak ari PPKS/i-CATS pampang Miri enggau Mukah.

    Abang Johari ti mega nyadi Menteri Wang enggau Pemansang Mengeri nandu baru madahka di Sarawak empu, Pengawa Latih enggau Pelajar Vokasional Teknikal (TVET) nyadi pemerat ba Perintah dalam nempa modal mensia ke ulih nyukung mayuh macham inisiatif ke bisi bekait enggau pemansang menua.

    “Ketegal tu, perintah ngelalau industri mega sama betatika tanggungpengawa ngelatih sereta nambah tikas pengelandik nembiak TVET nengah program latih baka ke digaga di menua Jerman.

    “Bepelasarka pengawa latih baka ke di Jerman, aku ngarapka industri ulih ngemansangka modal mensia baka tu, lalu aku ngarap ngambika ‘sistem dual latih’ ulih diberi kelala di Sarawak,” ku iya.

    Ku iya, lebuh ngenang pengawa latih baka ke di Jerman, alai pelatih dilatih tiga hari di industri, dua hari di palan latih, dalam kandang tiga taun.

    “Utai ke manah ditu, iya nya perintah ba tikas ke pengabis mimit ngemansangka modal mensia, pelatih nerima elawin ninting bulan, lalu pemerat nya sigi pengawa industri besai dalam ngemansangka modal mensia. Tu utai ke dikearap aku ngambika sistem bansa tu ulih diberi kelala di Sarawak.

    “Pemisi inisiatif baka Program Industri 4.0 sereta Ekonomi Digital, berat negapka gradual TVET enggau PPKS nyadi palan ke dikarapka, ke nyukung dalam nyendiaka modal mensia ke bekualiti,”ku iya.

    Sebedau nya, Chairman PPKS ti mega nyadi presiden i-CATS, Tan Sri Datuk Amar Abdul Aziz Husain ngarapka raban graduet dalam jeman diatu, ulih nitihka singkang ke seruran berubah sereta napi pemansang teknologi baru.

    “Aku pechaya bala graduet nemu gaya ke udah berubah diatu, ke nyadi ari sukut teknologi sereta rampa kitai. Aku ngelalau bala graduan seruran besedia napi gaya ke majak berubah,” ku iya.

    Iya nandu baru madahka kemaya hari tu, arus pemansang pelajar teknikal sereta vokasional pan sama enggau berubah senipak enggau pemerat industri.

    “Pekara tu seriris enggau inisiatif perintah nengeri Sarawak nengah pemansang Sarawak Corridor of Renewable Energy (SCORE) ngelatih mayuh agi pengereja pengawa dalam pengelandik manggai 2030.

    “PPKS chukup betuah laban dikearap perintah nengeri enggau industri berindik ari palan tu ke udah 22 taun ditumbuh, dalam mutar sereta nyendiaka endur belajar, kelebih agi bala nembiak Sarawak ti nyambung pelajar dalam bidang pengelandik baka teknikal enggau vokasional,” ku iya.

    Ba atur pengawa konvokesyen nya, tiga iku pelajar nerima gelar akademik tinggi, iya nya nengah Piala Presiden i-CATS 2017 ke dipenggi Nomi anak Delo ti nerima Gelar Pemujur Petronas, Piala Industri TVET 2017 diempu Broerslers anak Rinah enggau Rebecca Rudang Paul ke nerima gelar Pemujur Petronas, lalu Piala Pusingan Kejururawatan 2017 diempu Chin Fong Fong enggau Janet Liew Shaan Tze.

    Sama bisi enggau ngulu atur engawa nya kemari, Direktor Eksekutif PPKS, Hallman Sabri, enggau Ketuai Eksekutif i-CATS, Mohd. Isham Fauzi. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads