MPKS bisi nyendia servis aplikasyen ‘WhatApp Aduan Awam’ - Berita Iban Online

Header Ads

  • Baru Nyadi

    MPKS bisi nyendia servis aplikasyen ‘WhatApp Aduan Awam’

    Dato Peter Minos
    Nengah aplikasyen nya mensia mayuh tau ngenataika sebana, penanggul ke nyadi ba kandang dijaga MPKS.

    KOTA SAMARAHAN: Majlis Perbandaran kota Samarahan (MPKS) nyendiaka servis nengah aplikasyen ‘WhatApp Aduan Awam’ nengah lumur 013-8561116 ke ulih endur mensia mayuh ngenataika sebana, penanggul tauka penerang ke nyadi ba kandang endur ti dijaga opis kaunsil nya.

    Chairman MPKS, Dato Peter Minos madahka servis nengah aplikasyen nya ditumbuhka senipak enggau penyampau tubuh mensia, genturung pendiau enggau rumah kedai ti majak nambah ba bagi menua nya.

    Nitih ku iya, nengah chara nya dikearapka penanggul tauka sebana ulih diputarka enggau lengkas kelimpah ari dikena meri mayuh agi pemaik ba pengawa ngangkatka servis sereta ngenyemakka MPKS enggau raban bansa.

    “Diatu mensia mayuh di bagi menua Samarahan ulih ngenataika sebana, penanggul enggau penerang ngagai MPKS ngena WhatsApp ba lumur 013-8561116.

    “Kami deka meresa sereta bejalaika nama ke patut enti sebana tauka penanggul nya betul sereta amat nyadi. Tang kami enda ibuhka sebana tauka penanggul ke ditempa sengapa.

    “Mensia mayuh ulih ngenataika sebana tauka perambu pasal servis MPKS baka penanggul jalai, parit, pengawa ngumpul uras, nebas rumput, ngelasi parit enggau ke bukai,” ku iya.

    Peter mansutka pekara nya ba aum pengarang berita pengudah nyadi chairman aum penuh MPKS ba bilik baum Lib rari Mensia mayuh MPKS ditu, kemari.

    Semua sebana, penanggul sereta pemadah ke dianjung ngagai lumur WhatsApp nya enda tau enda disempulang enggau nama penuh, address, palan penanggul nya nyadi, pekara ke disebana tauka penanggul ke nyadi enggau gambar.

    Sebana ke diterima deka ditukuka diterima dalam timpuh 24 jam lalu deka direjista dalam sistem ‘Talikhidmat’.

    Berebak enggau tu Opis Bekuasa Kandang Menua udah bejadika penumbuh tim skuad 24/7 ke seruran sedia 24 jam.

    Tim skuad 24/7 mega deka datai enggau lengkas ngagai palan ke nyadi lalu bejalaika pansik sereta meri bantu tumu ke patut.

    MPKS seruran deka bebendar mutarka tetiap bengkah sebana ti diterima ba atur pengawa meri servis ti pemadu manah ngagai rayat.

    Sebana ke diterima nya patut ukai pasal penanggul diri lalu sebarang sebana ti bekaul enggau bansa enggau politik deka enda dikeibuhka. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads