‘Nadai kebuah aku ditukar’, ku Riot - Berita Iban Online

Header Ads

  • Baru Nyadi

    ‘Nadai kebuah aku ditukar’, ku Riot

    Dato Sri Richard Riot Jaem
    Riot andal dipilih baru nyadi chalun ba PRU14 bekau ari penyulut enggau pengeregas diri bejalaika pengawa.

    KUCHING: Bekau ari penyulut enggau pengeregas diri bejalaika pengawa, Kaban Parlimen Serian Dato Sri Richard Riot Jaem arap bendar iya ulih dipilih baru nyadi chalun ba pengawa bepilih besai ke-14 (PRU14) tu ila.

    Iya ti nyadi Menteri Sumber Manusia arap bendar ‘Rezeki’ bisi ba iya ke lalu ulih menang enggau majoriti besai enti dichalunka baru maya.

    “Aku arap bendar aku agi ulih dipilih nyadi chalun. Kelimpah ari pekara nya (enda dichalunka) datai ari menteri besai.

    “Nadai kebuah aku enda dipilih laban aku bisi ngayanka penyulut. Nuan tau betanya ngagai sapa aja ba renggat baruh, ba pasar (dalam sitak), ba aku nadai kebuah aku ditukar.

    “Aku seruran ngabas rayat, taja pan aku selalu bejalaika pengawa di Kuala Lumpur sereta ke menua tasik tang ninting ujung minggu aku tetap pulai ke Serian (sitak) lalu ukai semina di Kuching aja.

    “Aku udah lama dalam politik urung 27 taun, lalu sekalika bisi pengawa bepilih diatur tauka nadai ba aku sama aja laban aku selalu ngabas rayat,” ku iya lebuh dikerandau raban pengarang berita ba sebengkah pengerami.

    Riot madahka penemu orang ti madahka bisi penanggul maya turun padang nya enda betul laban iya endang seruran turun padang bejalaika pengawa.

    Ba pengawa bepilih besai Ke-13 ke diatur dalam taun 2013 Riot mengkang ngetanka sitak Parlimen Serian pengudah teulihka 19,494 undi ngalahka Edwards Andrew Luwak (DAP) semina teulihka 6,343 undi lalu Johnny Aput (Star) semina bulih 390 undi.

    Kelimpah ari nya lebuh ditanya bekaul enggau pengawa bepilih dalam partiiya nya PArti Rakyat Bersatu Sarawak (SUPP), iya madahka diri bedau nemu silik pasal pekara nya.

    Iya madahka diri enggai meri penerang dulu pasal pekara nya nyentuk pengawa bepilih dalam parti nya diatur dalam minggu baru maya pengawa gempuru parti.

    “Aku enda nemu sekalika bisi pengawa bepilih tauka nadai. Kitai deka nemu sekalika penuduk pemadu tinggi sekalika bisi diperebutka tauka nadai minggu baru iya nya 18 November,” ku iya ke nyadi Sapit Presiden SUPP.

    Dulu ari iya iya ngulu pengerami Krismas Bersama Penerima Faedah PERKESO 2017 ke diatur ba sebengkah hotel ditu, kemari. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads