Nadai kebuah aku patut minta ampun ngagai Fong - Berita Iban Online

Header Ads

  • Baru Nyadi

    Nadai kebuah aku patut minta ampun ngagai Fong

    Chong Chieng Jen
    KUCHING: Nadai kebuah aku ngaga pemetul sereta minta ampun ngagai Penyanding Penemu Undang-Undang Sarawak, Dato Sri J.C Fong bekaul enggau kes Keruntum ngelaban perintah negeri, pia ku Chairman DAP Nengeri, Chong Chieng Jen.

    Ku iya, penerang nya ukai dituju ngagai J.C Fong atas kapasiti iya empu tang perintah nengeri sentang pengulih ripot Komiti Entara Perintah (IGC) enggau Sempekat Malaysia 1963 (MA63) dipejalaika.

    “Nadai kebuah aku minta ampun ngagai penyanding penemu undang-undang Perintah Sarawak, Fong Joo Chung (Dato Sri J.C Fong).

    “Aku udah macha jurai ti dikenataika Fong dalam kes Keruntum Sdn Bhd ngelaban perintah nengeri lalu Fong ngarika perintah nengeri udah mantaika jurai ngagai Kort Federal” ku iya ba aum media begulai enggau Pemantu Khas iya, Kelvin Yii ba indu opis DAP ditu, kemari.

    Chong ke megaKaban Kunsil Nengeri (ADUN) Kota Sentosa madah, nyadi pengari rayat, sigi bisi pematut ngagai iya nanya perintah sentang penegap penemu sida bekaul enggau MA63 sereta Ripot IGC.

    Ku iya, nya kelebih agi lebuh penyanding penemu undang-undang perintah nengeri nya udah mantaika jurai iya ba kort ti dipeda baka enda setipak enggau penegap penemu ti disadung perintah nengeri ngagai semua rayat di Sarawak.

    “Kena 7 Disember 2017, Kort Federal nguna penegap penemu perintah negeri, iya langgur dalam Ripot IGC ke nempa sebagi ari Sempekat Malaysia ti nadai kuasa undang-undang semadi mih langgur nya dipasuk ke dalam Konstitusyen Perintah Besai tauka sebarang bagi undang-undang.

    “Perintah negeriengka udah menang ba atur undang-undang ngagai Keruntum Sdn Bhd tang nya deka ngenusahka sida ba pengawa ngulihka mayuh agi autonomi ke nengeri tu,” ku iya.

    Ku Chong, pemutus Kort Federal tentu deka dikena Perintah Besai ngelaban pinta Sarawak lebuh neritka atur pinta dalam MA63.

    Iya ngarapka Datuk Patinggi Abang Johari Tun Openg atas kapasiti nyadi Kepala Menteri, nerang ngagai rayat Sarawak sentang penemu sida ke bebida enggau ke dikenataika perintah nengeri ngagai Kort Federal enggau semua rayat di Sarawak.

    Dulu ari tu, J.C Fong ba sebengkah penerang ti dikeluarka Borneo Post ngenggaika tuduh Chong, ti madahka jurai ti dikantaika ba bulan Ogos dalam kes Keruntum ti madahka M63 enggau IGC, nadai kuasa undang-undang di Malaysia.

    “Saya deka nganjung surat ngagai Chong ti minta iya mandangka bagi ari jurai ti ngundan leka jaku ‘Ripot MA63 enggau IGC nadai kuasa undang-undang di Malaysia’

    “Enti (Chong) enda ulih ngereja nya dalam timpuh tujuh hari, iya enda tau enda ngaga pemetul ngagai mensia mayuh sereta minta ampun,” ku Fong. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads