Orang indu megai tanggungpengawa ti besai ba pemansang ekonomi enggau komuniti - Berita Iban Online

Header Ads

  • Baru Nyadi

    Orang indu megai tanggungpengawa ti besai ba pemansang ekonomi enggau komuniti

    LANTANG ATI: Rohani (bediri tengah) begambar ungkup kenang begulai enggau Chairman MPWK Sarawak pengudah pengawa nyuaka setipikit rambau atur program nya.
    KUCHING: Orang indu kemaya hari ukai semina megai tanggungpengawa ngemansangka ruang bilik, tang mega meseti ngaul diri ba pemansang ekonomi menua sereta komuniti.

    Menteri Pemansang Orang Indu, Ruang Bilik enggau Komuniti Malaysia, Datuk Seri Rohani Abdul Karim madahka, orang indu ke gawa beguna endar dikena nampung kuing pemansang menua lalu ba pekara tu nyata ngayanka chura baru ba penuduk sida ke indu dalam komuniti.

    “Ba pengawa menua deka nyapai tikas menua mansang enggau bepenatai pemisi tinggi ari pengawa sida ke indu napi pemar jeman globalisasyen sereta nyukung pemansang menua udah terang dibantai di baruh Atur Pemansang Malaysia Lumpar Ke-11 (RMK11).

    “Kelimpah ari nya, pangku pengawa raban indu ukai semina dipadah ba atur pemansang Malaysia aja, tang mega siti polisi khas udah ditempa dikena nyamin pemansang enggau pengulih raban indu.

    Polisi indu menua enggau Pelan Tindakan Pembangunan Wanita udah ditempa dikena ngenegapka kaul sida ke indu dalam sektor besai ti mungkur pekara ekonomi, pengerai enggau undang-undang sereta ngintu raban indu enggau ngemunaska pengawa nyamah indu,” ku iya lebuh bejaku ba Program Gempuru Begulai Enggau Chairman Komiti Pemansang Indu enggau Ruang Bilik (MPWK) Parlimen Renggat Nengeri Sarawak bepalan di sebengkah hotel tebilang, semak ditu.

    Ku iya, taja perintah udah bejalaika pengawa ngenegapka raban indu, agi tubah inisiatif enggau pengawa patut dipejalai ngambika raban indu ulih terus besemekih enggau bulih awak ti sama enggau sida ke lelaki ba jeman pemansang dunya kemaya hari.

    Nya kebuah ku iya, nentuka pekara tu ulih dijapai, nyadi tanggungpengawa kitai bela gawa, berunding sereta ngereja iya ngambika pengawa ngenegap enggau pemansang raban indu seruran nyadi agenda besai menua.

    Ku Rohani nambah, pengeran perintah ba pengawa ngangkatka tikas nama sida ke indu udah nyata dipeda lebuh Menteri Besai ngemendarka iya ba pengawa mantaika bajet taun tu, 2018 nyadi ‘Taun Ngenegapka Raban Indu’.

    “Berindik ari nya, aku deka bekunsi ke alai opis menteri enggau ejensi deka ngemayuhka aktiviti enggau intervensyen ba taun baru ngambika orang indu bisi mayuh agi awak ngiri enggau nambahka penemu bekaul enggau isu, awak enggau pemar ditapi, ngambika sida sedia agi sereta ulih besemekih gawa ba renggat antarabansa. Aktiviti enggau intervensyen ti dipejalai deka mungkur selampur menua, nyengkaum di Sarawak,” ku iya nerang.

    Ba pengawa ngemesaika pengawa orang indu dalam pemansang menua, sekeda agenda nasional pemansang raban indu udah ditempa. Kerejasama enggau sukung ari semua raban kelebih agi di menua endang deka diterima nentuka agenda nya mujur dipejalai.

    “Antara inisiatif tumu ti dipejalaika Opis Pemansang Orang Indu iya nya ngintu taun Ngenegapka Raban Indu, enggau pengawa ngelancharka rambai jaku ‘2GetHER Empowered’ dikena nampung pengawa ngenegapka raban indu ba mayuh bengkah bidang nyengkaum pengerai, pengelikun, ekonomi enggau main asal.

    “Kelimpah ari nya, Opis Menteri Pemansang Orang Indu, Ruang Bilik enggau Komuniti nengah LPPN deka bejalaika dua isi program di baruh Taun Ngenegapka Raban Indu iya nya Kimpin Meri Penyedar Pengerai Raban Indu nengah pejalai projek Touch Point: Wellbeing of Women (WOW) – Free Pap Smear Screening: enggau Ngintu Bulan Ruang Bilik Nasional 1Malaysia (BKK1M) Renggat Parlimen,” ku iya.

    Rohani mega bisi nerengka pekara pengerai orang indu nyadi pun pengelantang ba tetiap ruang bilik. Sedarka pekara nya, dalam bulan September tu tadi, LPPKN udah ngelancharka Kimpin Wellbeing of Women tauka WOW. Program tu meri pemerat ba pengawa nemu tumu riman sarang anak. Bisi 50,000 iku indu dipelaba deka teulihka pemaik ari program tu. Berita manah tu iya nya beperesa pap smear enggau nadai bebayar.

    “Taja servis diberi enggau nadai bebayar, nitihka pansik ti kala dipejalaika National Health and Morbidity Survey (2006) semina 47.3 peratus aja orang indu beperesa pap smear. Penyampau tu bisi baruh lalu dikeirau, dibanding enggau penyampau tubuh sida ti ditepan penyakit riman majak nambah ninting taun. Opis Menteri Pengerai Malaysia udah ngeripot bisi 2000 ngagai 3000 iku tama sepital ba kes riman pun sarang anak tetiap taun.

    “Nemu pangka sakit riman ngagai sida ti ditepan enggau sida sebilik, aku deka minta ngambika bala chairman enggau pengari MPWK ti datai ngena awak tu ngerembaika penerang pasal pemaik program ti disedia tu.

    “Sedarka pemesai guna pengerai ba ruang bilik, KPWKM udah ngemendarka agih belanja dikena bejalaika aktiviti baka ti udah dipadah ba 155 sitak Parlimen ti ditapatka MPWK. Kelebih agi di Nengeri Sarawak, bisi 27 sitak Parlimen deka ditapat udah dikelala,” ku iya nambah.

    Ku iya nambah, tetiap sitak parlimen ti deka ditapat diagihka belanja penyampau RM10,000 dikena bejalaika Kimpin Meri Penyedar Pengerai Raban Indu – projek Touch Point: WOW – Free Pap Smear Screening enggau BKK1M 2017 Renggat Parlimen. Tetiap program diagihka RM5,000.

    Opis menteri mega bisi tagit ba Kimpin Meri Penyedar Pengerai Raban Indu – projek Touch Point: WOW – Free Pap Smear Screening ngagai 300 iku klien. Taja pia, atur pejalai ulih digaga berenggat ba pengawa ti mit.

    Kelimpah ari nya, dikena ngemujurka pengawa ngintu BKK1M 2017 ti deka diintu dalam bulan November tetiap taun, KPWKM nengah Lembaga Penduduk dan Pembangunan Keluarga Negara (LPPKN) deka neruska kerejasama rat enggau MPWK kelebih agi di renggat Nengeri Sarawak tu ngambi bejalaika Program Keluarga Bahagia: ”Saya Sayang Keluarga Saya”.

    “Ba atur pengawa ngintu BKK1M Renggat Parlimen, tagit iya nya 500 iku ari ruang bilik ari komuniti di menua nya. Pekara ti dikearapka kitai iya nya pejalai program enggau bemacham aktiviti ti ngemai pemaik udah dilangkar ti ngemeratka pekara neritka kaul, pengasih, pengelantang, interaksyen, kaul begulai sereta penyiru ti dibantai nengah kaul tetiap iku diri sebilik, ngelimpangka ja diri ba aktiviti diri sebilik,” ku iya nandu.

    Sama bisi datai Sapit Ketuai Sekretari KPWKM, Azman Mohd Yusof sereta bala pemesai kanan KPWKM ke bukai. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads