Pandikar baka minta diketawa, sapa iya deka nyakap KM kitai? - Berita Iban Online

Header Ads

  • Baru Nyadi

    Pandikar baka minta diketawa, sapa iya deka nyakap KM kitai?

    Datuk Patinggi Abang Johari Tun Openg
    KUCHING: Ulah Speaker Dewan Rakyat, Tan Sri Pandikar Amin Mulia ke nyakap Kepala Menteri (KM) Datuk Patinggi Abang Johari Tun Openg belaban penemu senentang Sempekat Malaysia 1963 (MA63) iya nya baka ti minta diketawa, pia ku Parti Rakyat Bersatu (UPP).

    Nitih ku Sekretari Besai UPP, George Lo, pengawa nya mega nadai nerima timbal ari Kepala Menteri.

    “Baka orang bukai ti udah nyemetak ngayanka diri, sapa Amin deka nyakap Kepala Menteri kitai? Kepala Menteri ngetuaika Sarawak, siku ari bakih ba pengawa numbuhka Malaysia seraya Amin tu semina dipadu mangku pengawa ti disukung orang bukai,” ku iya nambah.

    Nyema Amin bisi ati bemain enggau bala iya, Lo merambu ngagai Amin tau belaban penemu enggau Presiden Parti Reformasi Sarawak (STAR) Lina Soo, semina siku iya aja ti ngumbai ulah nyakap ti enda diterima akal nya patut diterima.

    Iya mega madahka tetiap iku peranak Sarawak ngiarka bida politik ngambika bediri teguh di belakang Kepala Menteri ba pengawa iya negika hak Sarawak di baruh MA63 ngambi dipulaika baru.

    Pengudah mansutka jaku nya, iya mega madahka semua orang di Sarawak endang beserakup nyukung Kepala Menteri lalu Amin tauka sebarang orang enda deka mendingka pengawa ningkah ari Sarawak.

    “Ulih Amin bebulaka berapa mayuh peranak Sabah ti nyukung penetap iya ti enda ulih diterima akal ti nulak hak Sabah di baruh MA63? Iya nadai berasai sanggu laban endang nadai,” ku Lo.

    Nya kebuah Lo ngumbai Amin patut nguji pekara tu ari bediri minta pilih maya pengawa bepilih parlimen ti deka datai lalu iya deka belajar nama pekara ke amat ba runding peranak Sabah ba pekara nulak hak sida di baruh MA63.

    Taja ulah Amin ngayanka pemabu runding iya, ku Lo, tu siti pekara ti positif datai ari iya, negutka agi pengering enggau penyerakup peranak Sarawak bediri teguh di belakang Kepala Menteri ba pengawa ngambi pulai baru hak nengeri tu.

    “Kitai tau meri terima kasih ngagai Amin ti ngingatka kitai pemesai guna iya, ke alai semua kitai meseti begempung ba pengawa minta pulai hak kitai laban deka mayuh penekul nyempulang iya. Penyerakup kitai deka ngeringka agi Kepala Menteri maya mantai runding,” ku iya. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads