PBB Katibas seruran meri sukung tegap ngagai Nanta - Berita Iban Online

Header Ads

  • Baru Nyadi

    PBB Katibas seruran meri sukung tegap ngagai Nanta

    Datuk Ambrose Blikau Enturan
    KAPIT: Komiti Tetinggi Parti Pesaka Bumiputera Bersatu (PBB) Katibas udah nyapai tiga resolusyen rambau Aum Besai Tiga Taun Sekali (TGM) ke diatur di Balai Komuniti Song, apin lama ke udah.

    TGM tu betuaika Kaban Kunsil Nengeri (ADUN) Katibas, Datuk Ambrose Blikau Enturan.

    Entara tiga resolusyen ke bisi dibantai rambau TGM nyengkaum minta pangku pengawa presiden parti enda diperebut, nadai pengawa bepilih ba pangku pengawa sapit presiden lalu ketiga, nyukung penyandang Kaban Parlimen (MP) Kapit, Datuk Alexander Nanta Linggi, ke lalu nyadi Sapit Menteri Pemansang Menua Pesisir enggau Kandang Menua ngambi dichalunka baru nyadi chalun Barisan Nasional (BN) ungkup Kapit maya Pengawa Bepilih Besai Ke-14 (PRU14) ti deka datai.

    Ba lansa aum nya, Blikau udah dipilih nyadi chairman Komiti Tetinggi PBB Katibas, Kunsilor Rose Demon Simpang dipilih nyadi Ketuai Indu seraya Kunsilor Zully Datuk Ambrose Blikau dipilih nyadi Ketuai Nembiak PBB Katibas ke nyilih Handry Ann Salang, ti milih enda ngerebut pangku pengawa nya.

    Bejaku ba mua bala kaban parti rambau atur pengawa sehari nya, Blikau meri terima kasih ngagai semua kaban parti ke udah datai ngulu TGM, nitihka atur enggau pinta ba pengawa bepilih kaban komiti ungkup penggal 2017-2019 sereta mega milih kaban ti deka ngulu Konvensyen PBB ke deka diatur di BCCK ba timpuh ke patut.

    Iya minta bala kaban parti ngambi taluk sereta begempung meri sukung sida di belakang parti (PBB), nyadi tulang belakang BN di nengeri Sarawak.

    “Penegap politik kitai ulih mantu kitai nyingkang ke mua. Pia mega, kitai patut ngubah runding diri. Dalam jeman baru, kitai napi pemar baru lalu kitai meseti nerima ubah tauka kitai deka tinggal di belakang.

    “Semina siti aja jalai dikena kitai ulih nyingkang mansang iya nya nengah pelajar. Nya alai, kitai patut meri pemerat ba pekara pelajar bala anak kitai laban penemu nyadika reta kitai,” ku Blikau.

    Blikau mega ngelalau bala kaban anang betenahka pangan diri.

    Anang ngaga ulah ti tau nanggul dalam parti, tang kitai patut agi nyukung pangan diri sereta gawa rat begulai dalam siti tim ngenegapka parti,” ku Blikau nyemetak madah.

    Sama bisi datai nya iya nya bini Blikau, Datin Marie Therese Malthias, Ketuai Indu, Kunsilor Rose Demon Simpang, Ketuai Nembiak Kunsilor Zully Datuk Ambrose Blikau, chairman unit, bala ketuai komuniti sereta bisi 400 iku bala kaban parti PBB ke bukai.

    Ba pengujung bulan November, Blikau udah bejadika TGM mayuh bengkah unit PBB Katibas ungkup kandang menua Ulu Katibas enggau Batang Rajang ke diatur di Balai Komuniti Song, kena pagi Hari Satu.

    Unit tu nyengkaum Pasar Song, Temalat, Sungai Iran, Beguang, Sungai Song enggau Embuau. TGM unit nya diatur kena nyediaka diri ba TGM Badan Indu PBB Katibas ti deka diatur enda lama da agi.

    Dulu agi ari nya, Blikau mega bisi bejadika TGM ke sama ungkup mayuh bengkah unit ungkup kandang menua Tengah Katibas ke diatur di Rumah Garai di Nanga Tekalit, Katibas. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads