PBB Telang Usan nyukung chalun ti deka bediri di Parlimen Baram - Berita Iban Online

Header Ads

  • Baru Nyadi

    PBB Telang Usan nyukung chalun ti deka bediri di Parlimen Baram

    Dennis Ngau
    MIRI: Parti Pesaka Bumiputera Bersatu (PBB) Pampang Telang Usan seruran nyukung chalun ti deka bediri minta pilih ba penuduk Parlimen Baram maya Pengawa Bepilih Besai (PRU) Ke-14.

    Kaban Kunsil Nengeri (ADUN) Telang Usan, Dennis Ngau madah, nyadi komponen parti Barisan Nasional (BN) ti seati, sida enda ngaul diri ba pengawa milih chalun.

    “Kitai (PBB) bisi displin sereta bebasaka pangan diri, kitai endang ari suba nadai kala ngaul diri ba pengawa milih chalun ari komponen parti BN maya pengawa bepilih,” ku iya ditu, kemari.

    Ku Dennis, penuduk Parlimen Baram dipenggi Parti Progresif Demokratik (PDP) lalu penyandang iya, Anyi Ngau, nyangka deka dipilih baru.

    Ba rikod, penuduk Kunsil Nengeri (DUN) Marudi mega dipenggi PDP, seraya DUN Telang Usan enggau DUN Mulu pulai ngagai PBB.

    Sebedau tu, raban Nembiak PDP madahka diri deka bediri teguh di belakang bala ketuai parti nya enggau BN sereta nyukung tiga penyandang parti ti deka disabung baru maya PRU14.

    Bala sida tu iya nya Parlimen Bintulu Datuk Seri Tiong King Sing, Parlimen Mas Gading Datuk Anthony Nogeh Gumbek enggau Parlimen Baram Anyi Ngau.

    “Ditu kitai beratika disiplin parti komponen BN iya nya kitai enda deka ngaul diri ba atur pengawa milih chalun, bebasaka pemutus komponen parti sereta nyukung chalun ke dipilih,” ku iya.

    Nitih ku iya, semua komponen parti deka gawa nyaup pangan diri nentuka pemenang chalun ti deka bediri minta pilih ila.

    “Aku udah madah ngagai bala kaban PBB Telang Usan ngambika terus gawa ngaul bala rayat sereta mantu nentuka pemenang BN maya PRU ila,” ku iya nerang.

    Berindik ari nya, kimpin ngagai rumah ke rumah sereta program ‘walkabout’ endang agi ulih dipejalai dikena meri penerang ngagai rayat ba pekara pemansang ti udah dibai perintah BN.

    “Kitai ngaku kimpin nengah media rama tauka aplikasyen rama baka ‘WhatsApp’ jampat sereta rumpas agi dikereja, tang bisi maya penerang ke betul tau dikalih sekeda raban.

    Taja pia, raban gawaka pengawa bepilih BN bisi tim pemadah ti deka ningkah semua jaku ditabur ba aplikasyen rama sereta deka gawa ngagai menua ngemetulka berita pelesu,” ku iya nyemetak madah.

    Dennis madahka PBB Telang Usan mega deka merambu semua penuduk tetinggi dalam PBB enda diperebut maya Gempuru Besai Tiga Taun Sekali PBB taun baru. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads