PBT meseti sedia besemekih dalam dunya Ekonomi Digital - Berita Iban Online

Header Ads

  • Baru Nyadi

    PBT meseti sedia besemekih dalam dunya Ekonomi Digital

    PBT PATUT MUNGKAL UBAH DULU: Irwan (kanan), disempulang pengari ari ‘Community and Outreach Lead’, MAGIC Sarawak, Amirin Arsyan (kiba) enggau lebuh nyaut sekeda tanya ari orang ke ngulu randau ‘Only One with: Ask Me Anything” ba MAGIC Sarawak, kemari.
    KUCHING: Opis Ejensi Kandang Menua (PBT) enda tau enda nyikap diri dulu nyengkaum sedia besemekih dalam dunya Ekonomi Digital (DE) baka kemaya hari tu.

    Ketuai Sekretari sereta Ketuai Servis ari baruh Opis Menteri Wang, Tan Sri Irwan Serigar madah, PBT enda tau enda berubah laban rayat sereta menua tu enda tau enda besemekih, ngambika bisi ubah ba sistem-eko kitai.

    “Aum aku enggau Menteri Besai (PM) Datuk Seri Mohd Najib Tun Razak bedau lama tu tadi, aku madahka enti kitai ngelakka kompeni besai aja besemekih, rayat kitai enda berubah laban tu dikesema baka ‘manuk enggau telu’, rayat kitai begunaka peminta ke besai.

    “Nya alai, Perintah Menua Malaysia ngemendarka kompeni mit tauka orang dagang ke baru deka angkatka diri nyadi orang dagang ke besai, kemendarka sida bejalaika dagang sereta besemekih enggau pangan diri, nyengkaum ulih besemekih enggau kompeni ke bebesai,”ku Irwan.

    Iya madah munyi nya lebuh ke nyaut sekeda tanya ari bala nembiak sereta orang dagang SME ke bisi ngulu randau ‘Only One with: Ask Me Anything” di MAGIC (Malaysian Global Innovation & Creativity Centre)Sarawak ditu, kemari.

    Lebuh nyaut tanya ari chairman ke megai tanggungpengawa ba pekara DE, ba Balai Dagang China Kuching, Roger Chan,ke iya nanya pasal kapasiti niri sereta penemu ke ulih digaga dewan nya nyukung sistem-eko DE, sereta ungkup dalam Bajet 2018 tu tadi (ti dibantaika PM)ti bisi ngagihka RM3 bilion ngagai Sarawak ungkup 10 infrastruktur ke pemadu besai di Sarawak,tang mayuh bengkah sitak menua di Sarawak mengkang bedau dikemansangka penyikap internet, lalu pekara tu udah dipadah ngagai Telekom Malaysia.

    “Enti pekara tu nyengkaum kompeni ke mit-mit, kemendarka kompeni mit-mit tu ngemansangka internet ba sekeda sitak, kurangka ungkus, sediaka perengka guna, udah nya baru kitai beratika ungkus nya diturun, TM pan deka ‘muka mata’ sida, nyengkaum kompeni telekomunikesyen bukai ke sama deka ngemansangka infrastuktur nya, laban bisi orang enggau sida iya besemekih,” ku Irwan, seraya madahka jemah ila, kitai deka beratika mayuh ubah setipak enggau DE.

    Kelimpah ari RM3 bilion ti diungkupka Perintah Besai ku iya, perintah nengeri mega bisi nyendiaka wang turu RM1 bilion dikena nyendiaka perengka guna internet di Sarawak.

    Nambahka nya, opis menteri sida bisi nyendiaka program begulai enggau MCMC sereta Opis Menteri Multimedia enggau Komunikesyen, siti program MBOS (Malaysia Blue Ocean Strategy) ke bepelasarka ‘connected the unconnected’ di kemansangka nyengkaum ngagai menua pesisir sereta mengeri.

    “Pengawa ngemansangka internet tu mungkur mengeri enggau menua pesisir (ke dipejalaika nengah MCMC).

    “Peratika gaya peneras internet kitai naka ke diatu, kelalu lubah, tu entara pekara ti patut diperatika opis menteri.

    “Ngaga perengka guna tu, ungkus enda tau enda diturunka, lalu enda tau enda deras,” ku iya.

    “Semua PBTm baik nya ba renggat menua tu aja tauka ba perintah besai, anang semina ngaga pengawa ke teleba digaga baka ke udah. Diatu kitai udah nyingkang ngaga DE, lalu kitai enda tau enda nyingkang nuju ubah nya, baik nya ari sukut TM tauka ejensi bukai.

    “Dunya majak berubah, runding kitai enda tau enda berubah, laban semua perengka guna, utai ke digaga kitai, semua berubah,” ku iya.

    Ku iya baru,dalam perspektif dunya sereta ekonomi Malaysia kelebih agi ba pekara DE, chunto siti pemansang ke chukup popular di Kuching kemaya hari tu, iya nya bejualka pemakai ngena trak (food truck).

    “Taja pan nadai bekaul enggau DE (Food Truck), PBT ngemendarka trak bejualka pemakai, tang enda ngemendarka trak pemakai tu nyendiaka endur alai orang makai (kerusi mija).

    “Perundingka orang ti meli pemakai nya ke semina bediri makai.PBT ngemendarka trak bejual pemakai tang enda ngemendarka nyendia kerusi enggau mija… Nya utai ku aku, PBT mesti ngubah chara sida iya gawa sereta berunding,” ku iya.

    Lalu baka nya mega enggau Uber ku iya, lebuh Uber dipungkalka di Malaysia.

    “Aku nyukung Uber, tang ku gerempung teksi, aku ‘munuh’ dagang sida. Ba aku, enti kitai deka berubah jauh agi mansang baka orang bukai, nama penyalah orang ke deriba teksi nya nunda ubah nya,” ku iya.

    Ari sukut ekonomi ku iya, ke diatu, ekonomi Malaysia ba penuduk ke manah.

    “Taun tu, Perintah melabaka pemansang ekonomi entara 5 ngagai 6 peratus.

    “Ba ujung penggal taun tu (2017) ekonomi Malaysia diperatika bisi nambah manggai ba 6.2 peratus, taja pan rega minyak niki, penyampau ringgit kitai (Ringgit Malaysia tauka RM) nurun ngagai RM4.05 (dibanding enggau USD),” ku iya. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads