Pemujur program MYTV di Kapit dipuji Masing - Berita Iban Online

Header Ads

  • Baru Nyadi

    Pemujur program MYTV di Kapit dipuji Masing

    UNGKUP KENANG: (Duduk ari kiba) Ekni Haji Raduan, Douglas Pungga, Dato’ Dzulkafli Mustaffa, Masing, Ugak, Elvis Didit, enggau Dr Abdul Rahman Deen.
    KAPIT: Sapit Kepala Menteri Sarawak, Tan Sri Datuk Amar Dr James Jemut Masing meri terima kasih ngagai raban Soldadu Darat Malaysia (TDM) laban bekerejasama enggau ejensi bukai ba pengawa ngatur ‘Mobile Youth Transformation Vocational Program Kapit - MYTV’.

    Mayuh bengkah kus udah diatur setipak enggau pengerindu bala pesereta baka salun nguntin buk, berapi enggau nyediaka pemakai, pemajik gamal enggau latih industri baka ngaduka paip ai, nyambung tali karan, ngechat, pengawa berumah, pengawa betanam betupi sereta ke bukai.

    “Tu program ke chukup manah, bala pesereta datai ari sida ti enda nyulut dalam akademik tauka sida ke belajar ba Pom Tiga, Pom Lima, udah lepas sekula tauka raban nembiak nadai batang kereja.

    “Tu program outreach ti nyediaka latih industri dikena nyikap sida maya pengawa ngaga Tekat Ai Baleh dalam taun 2018 berengkah dipejalai.

    “Nya kebuah di baruh Strategi Tasik Biru Nasional (NBOS) datai nyaup ba pengawa nyikap sida (raban nembiak) ngambika sedia ngerebut pengawa puang,” ku Masing kena lemai Hari Enam, lebuh iya bejadika ‘Majlis Amanat Program MYTV Kapit’, di Dewan Kejora, SMK Kapit 2 ditu, kena 2 Desember tadi.

    Program udah diatur berengkah ari 30 November nyentuk 14 Desember tu ila.

    “Bisi sekeda pekara deka datai ngagai Kapit enda lama da agi, jalai ari Sibu ngagai Kapit, Kapit Putai, Baleh deka disambung. Kami melabaka mayuh orang deka datai napatka menua Kapit.

    “Peranak menua tu meseti sedia nangkup pemayuh tubuh mensia ti deka datai berindik ari pengawa ngaga Tekat Ai Baleh. Bisi beratus pengawa puang ngaga Tekat Ai Baleh.

    “Pekara ke bukai iya nya peranak menua tu meseti sedia ngerebut awak dagang ti nyadi pengelebih sida. Dagang baka kedai salun, nguntin buk, nyediaka pemakai enggau restaurant sereta ke bukai.

    “Nyema sida ulih ngereja pengawa memanh iya ulih mansutka penatai ti meruan. Enti sema enda, abis nadai sida ulih ngiri penemu enggau pengelandik. Tu seriris enggau NBOS,” ku Masing nerang.

    Iya nyemetak madahka pengawa ngaga Tekat Ai Baleh dipelaba deka nyediaka 3000 ngagai 4000 iti pengawa puang seraya Koridor Kuasa Ulih Dikena Baru Sarawak (SCORE) bisi 600,000 pekereja ti landik enggau jelan pengelandik datai taun 2023.

    Ku iya nambah, MYTV iya nya program ti dilangkar kena ngiri pengelandik teknikal enggau vokasional sereta penemu ngagai bala nembiak menua pesisir, sida ti enda nyulut ba akademik.

    Pengawa tu mega dikena nentuka sida beratika pekara ti patut digaga napi pemar ekonomi enggau pekara rama ti mangka sida.

    Iya berasai lantang enggau pemayuh ejensi ke bisi datai ngaul diri baka raban ari TDM, Opis Menteri Pelajar, Sains enggau Teknologi, Opis Menteri Wang, Petronas, GiatMara, Opis Menteri Pemansang Pengawa Industri, Akademi Binaan Malaysia (ABM), Kolej Komuniti, Akademi Opis Orang Indu enggau Ruang Bilik, Centre of Technical Excellence (CENTEXS), sereta ke bukai.

    “Ba penemu aku, pekara tu manah ngagai sida ti enda nyulut ba akademik. Aku berasai lantang endar sida (MYTV) udah datai kitu, menua bukai lalu bedau. Timbal chukup manah, bisi 200 iku pesereta dibanding enggau tagit semina 100 iku aja. Chukup manah.

    “Nya kebuah aku ngelimpangka awak diri terbai kitu sehari tu (Hari Enam), lalu pagila (Hari Minggu) pulai baru ke Kuching, semina deka meri peransang ngagai kita. Aku deka madah, pengawa ti dikereja kita sehari manahka pengindup dudi hari,” ku Masing nandu.

    Ba lansa ke bukai, Sapit Sekretari Mendam Opis Meteri Pelajar, Sains enggau Pansik Teknologi, Dr Abdul Rahman Deen dalam jaku dipansutka iya nerangka program di baruh NBOS ngemai latih teknikal enggau vokasional ngagai raban nembiak menua pesisir ngambika sida ulih dilatih dalam industri.

    Ku iya, ari latih nya, sekalika sida deka kereja tauka sida ulih namoung latih ba palan bukai (teknikal tauka vokasional) tauka sida tau ngepunka dagang kediri empu. Ambika chunto, kus nguntin buk. Ba program ke dulu suba, sekeda ari sida ti ngulu kus nguntin buk, udah ngepunka dagang nguntin buk, lalu sida teulihka pemujur.

    “Bisi sekeda pesereta kus berapi tauka kulinari kitai, udah ngepunka dagang sida empu. Kitai ngarapka, sida ulih berengkah ngatur dagang diri,” ku Dr Abdul Rahman Deen andal.

    Program ke diatur di Kapit udah berengkah kena 30 November nyentuk 14 Desember 2017. Sepemanjai program dua minggu nya, bala pesereta dilatih ba mayuh bengkah kus lalu kus tu mayuh peminta. Kitai mega minta bala pesereta empu milih. Kitai ngelangkar kus ti mayuh peminta di kandang menua tu, setipak enggau sida.

    Kitai ngarapka bala pesereta ditu nitihka latih memanah. Bisi sekeda ari sida udah tu deka ngepunka dagang tauka kereja enggau orang bukai, tauka nampung latih ba tikas tinggi agi ngiri penemu, tu batang tuju iya.

    Sama bisi datai Kaban Parlimen (MP) Hulu Rajang Datuk Wilson Ugak Kumbong, Dr Abdul Rahman Deen, Commander 9 Brigade Brigadier General Dato’ Dzulkafli Mustaffa, Major Dato’ David Ling (Wataniah), Senior Executive Group Strategic Communication Petronas Sarawak Ekni Haji Raduan, bala pemesai soldadu – Major Mohd Mohd Safri Bin Mat Jaya, Lieutenant Colonel Mohd Hazri Bin Ahmad sereta Lieutenant Colonel Zakaria Bin Abdul Rahman sereta bala bukai. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads