Pemutus PKR dipeda baka deka ngelaya PBDSB - Berita Iban Online

Header Ads

  • Baru Nyadi

    Pemutus PKR dipeda baka deka ngelaya PBDSB

    Patrick Anek Uren 
    KUCHING: Pemutus Parti Keadilan Rakyat (PKR) Sarawak ti netapka Nicholas Mujah Ason nyadi chalun potensial ngarika PKR di sitak Parlimen P.202 Sri Aman baka ke deka ngelaya Parti Bansa Dayak Sarawak Baru (PBDSB).

    Tekenyit enggau berita ke dipansutka nya, Sapit Presiden PBDSB Patrick Anek Uren melabaka Nicholas ke mega Sekretari Besai SADIA enda nemu sentang pekara nya.

    Mandal Chairman PKR Sarawak, See Chee How ba aum pengarang berita di Kuching ensanus bisi mantaika rintai chalun potensial PKR ungkup PRU14.

    Nicholas nitihka penerang See dirintai nyadi chalun potensial ngarika parti di Sri Aman.

    “Mujah tu chalun potensial kami, nya alai penerang See tu ngasuh kami alit ati.

    Aku melaba Mujah empu enda nemu pekara tu.

    “Jaku ti dipansutka See tu semina propaganda politik aja dikena narit ati mensia mayuh lalu siti ari chara PKR ngelabuhka populariti Cobbold John ba sitak parlimen Sri Aman,’ku iya nengah surat penerang berita kemari.

    Anek nambah, Cobbold dulu ari tu udah madah iya deka nyatup chalun PRS Masir Kujat ba parlimen Sri Aman.

    “Berindik enggau nya, Cobbold ngelengka niat ati deka nyatup chalun PDP Datuk Tiong King Sing di parlimen Bintulu laban meri awak ngagai Dr.

    John Brian betenggali alan,’ku Anek.

    Cobbold ke mega presiden PBDS dipeda regas sereta berani amat bejakuka hak Dayak enggau Sarawak sekumbang ti udah megai pangku pengawa presiden parti ari protem presiden Louis Jarau.

    Patrick ngasai ulah PKR tu enda jauh bida enggau BN ti sama bela enchadika undi Dayak dikena ngulihka pemujur.

    “Anang nyabung Dayak dalam PKR enggau DAP belaya enggau kami (PBDS).

    Kami (Dayak) deka nuju penyerakup politik”, ku Patrick.

    Ba Pengawa Bepilih Nengeri Ke-11 ti diatur ba bulan Mei 2016, Nicholas kala bediri ngarika PKR ba sitak DUN Balai Ringin.

    Ngenang kaul bukai, Anek mega madah bisi ninga berita Masir engka deka diganti enggau Doris Brodie ba parlimen Sri Aman ba PRU14 tu ila. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads