Pemutus UPSR 3A ulih diterima masuk MSRM - Berita Iban Online

Header Ads

  • Baru Nyadi

    Pemutus UPSR 3A ulih diterima masuk MSRM

    BEJADI: Alexander (enam kanan), Dennis (tujuh kanan) enggau bala temuai ke bikai sereta bala kaban komiti serakup enggau pengatur pengerami bela melah kek kelai bejadika pengerami lemai nya ungkup taun 2017 sereta Pengerami Mantar Krismas, ti diatur di Miri, malam kemari.
    Tu dikena ngangkatka pemansang pelajar bala nembiak di menua pesisir lebih agi di nengeri tu.

    MIRI: Bala nembiak lepas Ujian Penilaian Sekolah Rendah (UPSR) di sekula menua pesisir di nengeri tu, enda ibuh nyapai pemutus ti nyulut tang chukup enggau 3A aja endur sida ulih nampung pelajar ba Maktab Rendah Sains Mara (MRSM).

    Pengawa tu dipejalai pengudah diserenih raban ari Opis Menteri Pemansang Menua Pesisir enggau Kandang Menua (KKLBW) ti beratika bala nembiak di sekula menua pesisir lebuh diberi awak nampung pelajar ba MRSM, pemutus ti dijapai sida (ari peresa perintah) ngayanka penyulut sebaka enggau bala bakih ke bukai ti bulih 4A tauka 5A (maya keterubah nampung pelajar ba MRSM).

    Sapit Menteri iya, Datuk Alexander Nanta Linggi, madahka pengawa opis menteri tu dikena meransang sereta ngangkatka penyapai pelajar enggau pemansang bala nembiak di menua pesisir kelebih agi di nengeri tu, ngambika diberi awak sebaka nadai mida sida belalauka pemutus peresa perintah aja.

    “Atur tu ukai reti kitai deka ngemaruhka standard MRSM, tang kitai meretika bala anak kitai ti bulih pemutus 3A, tu iya nya sida ti belajar di sekula menua pesisir, seranta enggau belajar enda meruan ukai sebaka enggau sekula ti moden tauka mansang baka di mengeri.”

    “Kelimpah ari nya, betapi enggau penanggul suntuk enggau enda chukup tubuh pengajar ti gawa, ditambah enggau penusah ti ditapi sida laban gaya pemansang di ulu sungai,” ku iya.

    “Ari gaya perati kitai, sida ti bulih 3A tu, lebuh diberi awak nampung pelajar ngagai institusyen baka MRSM, sida ulih nyulut agi lalu nyapai pemutus ti manah, sebaka enggau bala bakih ti bulih 4A tauka 5A (ari sekula di mengeri),” ku iya nambah baru.

    Alexander ngelansa pasal pekara nya lebuh bejaku ba Pengerami Makai Lemai Ninting Taun Uma Aru Long Bedian (Pelilih Mit Long Bedian) 2017 ti diatur di sebengkah hotel tebilang ditu, malam kemari.

    Iya muji Kaban Kunsil Nengeri (ADUN) Telang Usan, Dennis Ngau, ti udah mantaika pekara enggau mosyen nya – ngambika bala nembiak ari kandang menua pesisir ti bulih 3A diterima nampung pelajar ngagai MRSM, meri jamin KKLBW deka mantu bala nembiak nya, ti bisi ati deka nampung pelajar ngagai maktab nya lalu mantu nampung pelajar sida ngagai menua luar.

    Ke diatu ku iya, bsii empat buah MRSM udah ditumbuh di nengeri tu nyengkaum ke baru di Bintulu, nambahka penyampau ke bisi, di Kuching, Betong enggau Mukah.

    Ngelansa pasal pengerami makai lemai nya bela ngemataka pengawa ngelanchar bejadika penumbuh Serakup Rama enggau Pengelantang Komuniti Long Bedian, Miri, ti udah mujur direjista enggau Opis Pengerejister Gerempung (ROS) apin lama ke udah.

    Ku Alexander, serakup ke bansa tu beguna endar ditumbuh di kandang genturung pendiau ke besai baka Long Bedian, laban iya beguna ba pengawa ngempung peranak sereta ngerapitka kaul diri ngagai bala peranak.

    “Tu seriris enggau rambai jaku kita ‘Kekal Bersatu’, ti nentuka tunga kuing serakup enggau peranak di genturung pendiau ngambika meruan begempung ba sebarang pekara ti nyadi enggau pemar ditapi sida sereta gawaka pemansang di menua pesisir,” ku iya.

    Ba lansa ke bukai, lebuhka nyaut isu bekal ai beresi ngagai Long Bedian ti dibantaika chairman serakup, Simon Emang, Alexander, nerangka KKLBW semina bejalaika pengawa ngaga loji meresi ai lalu batang paip besai (di dalam tanah) lalu pengudah pengawa nya tembu, iya deka diserah ngagai Perintah Nengeri sereta di Sarawak deka diserah ngagai Opis Bekal Ai Menua Pesisir (JBALB).

    “Ukai kitai deka enda kiruh tang udah diserah ngagai JBALB (ngambika atur enggau pengawa ngintu dipejalai), taja pia aku deka naka ulih nyaup,” ku iya.

    Ngelansa pasal penyambung tauka jalai batang sepemanjai tujuh kilometer ngagai Long Bedian ti apin dibelakin dataika sehari tu, Alexander mega mantaika pengasa diri senentang pekara nya ti agi tejanggal lalu besemaya deka ngemai pekara nya ngagai aum opis menteri iya ila.

    Kelimpah ari Dennis enggau Simon, sama bisi datai malam kemari Pemesai Pelilih Telang Usan, Baru Tai, ex-Sekretari Politik Kepala Menteri Datuk Robert Laing Anyi, Ketuai Komuniti Kampung Long Bedian, Usung Wan sereta bala temuai ke bukai.

    Bisi 750 iku bala ke bisi datai sekalika datai ari Kampung Long Bedian, Marudi, Miri, Bintulu enggau Kuching. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads