Penembu Jematan Tandang Sari udah dipenyadi kemari - Berita Iban Online

Header Ads

  • Baru Nyadi

    Penembu Jematan Tandang Sari udah dipenyadi kemari

    UNGKUP RAYAT: Abang Johari begulai enggau bala bukai bejalai ngabas Jematan Tandang Sari.
    PUSA: Sebuah jematan meraka Sungai Rimbas beungkus RM47 juta tembu digaga lalu diatu udah ulih ditengah sereta deka meri pemaik ngagai lebih 20,000 peranak menua pesisir di Pelilih Pusa.

    Jematan semin 327 meter pemanjai nya digaga dalam timpuh 36 bulan lalu udah dipenyadika Kepala Menteri Sarawak, Datuk Seri Abang Johari Tun Abang Openg.

    Bejaku ba pengerami bejadika jematan nya, ku Abang Johari, jematan Sungai Rimbas ke baru tu deka diberi nama Jematan Tandang Sari.

    “Pengawa ngaga jematan tu deka meri pemaik ngagai komuniti di menua nya, kelebih agi ngerichahka agi aktiviti ekonomi enggau nambahka penatai pemisi komuniti dia.

    “Tuju kitai deka ngasuh menua tu nyapai pemujur ba aktiviti betanam betupi, ti muntang agi lalu atur pejalai ke lanchar, enggau pemisi perengka guna ke bansa tu.

    “Ari chara tu, kitai pechaya deka ulih nampung pengawa ‘Tok Nan’ ti ngemeratka pengawa ngemansangka kandang menua pesisir,” ku iya.

    Pengawa tu udah diatur di laman Pasar Pusa lalu udah digulu urung 2,000 iku, datai ari peranak menua nya.

    Nitih ku Abang Johari, pengawa ngaga Jematan Tandang Sari tu deka nyungkak ekonomi peranak di menua pesisir di Pusa, Meludam enggau menua besemak.

    “Perintah nengeri deka terus nyediaka perengka guna infrastruktur pemun ngagai peranak menua pesisir di Sarawak, ngambika pengidup enggau ekonomi menyana agi.

    “Jematan Rimbas endang dianti peranak di Pusa laban sebedau tu sida semina bepanggai ba bot mit aja,” ku iya.

    Pia mega ku Abang Johari, iya ngarapka peranak di menua pesisir ngena perengka guna teknologi pemadah (IT) nyual produk betanam betupi sida, kelebih agi ari kandang menua tu ti tebilang enggau asil sungai enggau tasik.

    “Diatu perintah Sarawak benung chakah ngelakuka perengka guna IT dikena bejalaika pengawa dagang laban iya muntang sereta jampat agi.

    “Nya alai, kitai ngarapka komuniti kelebih agi di kandang menua pesisir ngena memanah perengka guna ti udah disedia dikena ngulihka belanja ti mayuh agi dudi hari, ngambika sida enda tinggal,” ku iya nandu nyemetak. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads