Pengajar di nengeri tu patut komited bejalaika tanggungpengawa - Berita Iban Online

Header Ads

  • Baru Nyadi

    Pengajar di nengeri tu patut komited bejalaika tanggungpengawa

    BEJADI: Manyin mangkung tawak 3 kali kelai bejadika Gempuru Besai Pengari KGBS Renggat ke-38 di Bintulu.
    BINTULU: Bala pengajar di nengeri tu dilalau ngambika terus komited bejalaika tanggungpengawa sida dikena nentuka tetiap nembiak sekula nerima pelajar ba tikas tipemadu manah, pia ku Menteri Pelajar, Sains enggau Pansik Teknologi Dato Sri Michael Manyin Jawong.

    Ku iya nerang, tetiap iku pengajar patut bisi penyiru ngajar nembiak sekula ba pengawa nyaup perintah nempa mayuh agi raban bepenemu sereta pintar runding dudi hari.

    “Ba pengawa tu, udah nyadi tanggungpengawa semua raban kelebih agi apai indai sereta pengajar ngaul kerejasama rat enggau pangan diri nentuka tetiap penanggul tauka isu bekaul akademik sereta kokurikulum bala anak sida ulih diputar enggau manah,” ku iya.

    Iya mansutka jaku nya lebuh bejadika Gempuru Besai Pengari Gerempung Pengajar Bumiputera Sarawak (KGBS) Renggat ke-38 ti diatur di Hotel Li Hua Bintulu, ditu.

    Ku iya, KGBS nyadi entara serakup bala pengajar ti chakah di nengeri tu patut nyaup opis menteri iya berundingka chara pemadu manah dikena ngemanahka penyapai akademik nembiak di semua seklula di nengeri tu.

    “Semua tu dikena nentuka tikas pemanah pelajar di nengeri tu ulih dikemanahka agi ari ke dulu suba ngambika penyapai bala nembiak sebaka enggau nengeri ke bukai di menua tu ti berupai nyulut ba pemutus akademik sida,” ku iya.

    Iya enda ngenggaika tu ukai nya siti pengawa ti muntang ketegal gaya pendiau sekula ti jauh di menua ulu.

    Taja pia ku iya, bala pengajar patut nangkup peminta tu enggau ati ti lurus laban perintah endang balat ngemeratka pekara pelajar ti nyadi siti chara nyungkak tikas pengidup peranak di menua tu.

    Ba lansa pekara bekaul, Manyin mega bisi ngemendarka bantu penyampau RM10, 000 ungkup KGBS dikena sida bejalaika bemacham program ti diatur gerempung nya.

    Presiden (KGBS) Ahmad Malie, Direktor Opisn Pelajar Sarawak (JPS), Rokayah Madon enggau Pemesai Pelajar Pelilih (PPD) Bintulu Fred Entau, antara bala ke bisi datai. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads