Pengawa ngasilka tambak nanas MD2 benung chakah dipejalaika - Berita Iban Online

Header Ads

  • Baru Nyadi

    Pengawa ngasilka tambak nanas MD2 benung chakah dipejalaika

    Dato Anthony Nogeh
    KUCHING: Pengawa ngasilka tambak nanas ngambika ditanam di Sarawak benung chakah dipejalaika.

    Sapit Menteri Industri Bepelasarka Agro enggau Betanam Betupi, Dato Anthony Nogeh madahka bisi 100,000 tambak nanas MD2 dipelaba datai kitu ari Johor dalam taun baru.

    Ku iya, tambak nya dikena nguji sereta mega dikerembai.

    Nogeh, ke mega Kaban Parlimen Mas Gading, madahka diatu bisi 700,000 paung nanas, diasilka dalam proses nerenak tisu utai tumbuh, ti udah dipejalai di Genturung Pendiau Pijuru, Bau.

    Ku iya, paung nya udah dianjung sereta diintu Kaunsil Industri Nanas Malaysia (MPIB).

    “Paung tu deka ditinggalka nyentukka bebuah sereta ngasilka tambak.

    “Tambak udah nya deka diagih ngagai raban orang bumai, kelebih agi pekebun di Mas Gading,” ku iya kemari.

    Ku Nogeh,nurseri mega ditumbuh dikena nentuka seruran bisi bekal ke chukup tambak nanas MD2 ngagai orang bumai ukai semina di Mas Gading aja, tang mega di nengeri tu.

    Iya beratika seraya nganti paung MD2 diagih ngagai orang bumai, MPIB udah chakah ngelakuka pengawa nanam bemacham bansa utai tumbuh ke bukai ungkup makit di menua tu.

    Ukai baka bansa ke bukai ku iya, nanas MD2 tu ditanam ungkup eksport laban buah iya ulih tan dalam timpuh pejalai ke lama.

    “Bansa MD2 tu ulih tan lama disimpan, ngasuh nya nyadi pilih ti engkeman ungkup eksport,” ku iya.

    Diatu, bisi tiga bansa nanas ke mayuh ditanam di Malaysia iya nya Mauritius, Sarawak enggau Gandol.

    Bisi mega bansa ke bukai, ke diasilka nengah chara hidrid baka Maspine hybrid, N36, enggau nanas Josapine, udah ditanam.

    Nanas bansa Moris, Sarawak enggau Josapine ditanam ke guna ditu lalu Gandul diproses nyadi nanas dalam tin enggau jus buah, seraya N36 enggau Maspine ungkup kededua pekara di atas.

    Antara produk diasil ari nanas iya nya tart nanas, jem nanas, Chip Nanas, chokelat ke diisi nanas, Sos Chili Nanas, Sos Masam Manis, Rolls Nanas, enggau ruti tusu nanas. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads