Pengawa ngempang jalai entara chara dikena ngetan tanah NCR - Berita Iban Online

Header Ads

  • Baru Nyadi

    Pengawa ngempang jalai entara chara dikena ngetan tanah NCR

    Peter John Jaban
    Pekara nya disetuju semua raban aktivis pengudah perintah enda ngakun tanah NCR diempu bansa asal nitihka pematut, ku Peter.

    KUCHING: Peranak bansa asal Sarawak ke napi pemar ngenanka tanah pesaka, tanah adat bansa asal (NCR) disadang deka ngempang jalai tama nuju tanah ti udah tauka deka dikereja kompeni, ku Aktivis Rama Peter John Jaban.

    Iya pechaya ngempang jalai tama nyadi sebengkah agi chara dikena ngenan tanah NCR ti majak dirampas perintah nengah Provisional lease (PL) ke diberi ngagai kompeni

    Peter madah pekara nya disetuju semua raban aktivis hak tanah lalu diasaika berat pengudah perintah enda ngakun tanah NCR diempu bansa asal nitihka pematut.

    “Pengudah gempuru bebala mayuh minta perintah ngelengkas atur ngubah undang-undang tanah ngambi tanah NCR diakun di Kuching kena 13 November tu tadi, kitai ngasai ‘blockades’ nyadi sebengkah agi chara,” ku Peter lebuh dikerandau.

    ‘Blockades’ ku Peter deka muru perintah enggau kompeni ari tama sereta ngereja tanah pesaka bansa Dayak ke dipeturun aki inik sebedau jeman perintah Brooke.

    Iya pechaya atur nya mega ulih ngelengkas perintah ngadu pekara ke patut diadu.

    “Baka kitai ke nepuk tengiling ari lubang tanah, ngambi iya pansut. Sama mega enggau perintah ti tusah enggau berunding tauka betemu.

    “Kami Dayak enggai nyadi enda ngiga pengidup ba kebun. Kami enda ulih ke kebun laban ditan bala sekuriti Ladang. Tanah kebun Lada, Getah enggau umai kami dalam Provisional Lease.

    “Enti enda pia, baka ka nadai pengujung. Nya aja chara diatu, blockades,” ku iya nambah.

    Nitihka penerang Peter, perambu ngaga blockades nya dibai ex-MP Harrison Ngau lalu udah kala dikereja dulu suba ti ngujungka bisi nyadi penyarut entara otoriti enggau orang ke ngaga blockades.

    Harrison merambu bala Dayak ngaga blockades ba pengelama seminggu nyentuk ngagai dua minggu ba serata Sarawak.

    Blockades nya ku iya deka ngeruga penatai pemisi kompeni lalu kala digaga mantah projek ngaga tekat ai (hidro) Baram.

    “Sida ngaga blockades ngagai palan projek tekat ai hidro Baram pengelama dua taun lalu ngujungka perintah enda neruska projek nya,”ku Peter.

    Peranak asal Sarawak ngansak perintah ngaga ubah ba kod tanah Sarawak ngambika Pemakai Menua enggau Pulau Galau diakun nyadi tanah NCR.

    Diatu undang-undang nya semina ngakun Tanah Temuda aja.

    Peter nambah SADIA deka ngenataika surat nusui pekara nya ngagai United Nation sereta European Unions.

    Kena 13 Oktober tu tadi, Kort Federal sekali agi mai berita enda manah ngagai komuniti Dayak pengudah ngalihka pemutus Kort Tinggi enggau Kort Apil ti dulu ari tu miakka orang bempu tanah.

    Pemutus Kort Federal netapka peranak asal ke bempu tanah enda ulih ngakun nya tanah sida agi tang semina deka diberi bayar pampas.

    Seiku agi aktivis tanah, Nicholas Mujah setujuka perambu ngaga blockades.

    “Enti udah nadai daya nadai chara bukai agi, ka pan enda ngaga blockades mih chara kitai ketegal undang-undang udah enda miakka kitai agi,” ku iya. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads