Header Ads

  • Berita Tebaru

    Pengempu tanah NCR dipejal nerima bayar pampas ngambi nyerahka tanah pesaka

    Pesereta ke nyereta gempuru di Tekuyong Pantu ngenataika bantah ngagai Perintah BN.
    PANTU: Tuai Rumah (Tr) Masa, Nyutan enggau Sandah dekaka tanah NCR diberi pulai lalu enda nerima bayar pampas.

    Ba pengawa gempuru bejuraika kes pechara tanah NCR ke alah ba Kort Federal ke diatur di Tekuyong, Pantu kena 3 Disember tu tadi, sida nyemetak madahka enda nerima bayar pampas lalu deka ngenanka reta pesaka aki ini ari 8 peturun.

    “Kitai udah bebendar ngenanka tanah kenyau ari taun 2004 nyentuk ke diatu (2017). Kitai menang pechara ba Kort Tinggi enggau Kort Apil.

    “Tang enda memukai kitai alah ba Kort Federal ti ngujungka kitai nadai kuasa ba tanah diri lalu dipejal nerima bayar pampas,”ku Tr Masa anak Nangkai.

    Iya nambah, tanah nya diberi ‘Provisional Lease’ (PL) ngagai kompeni enggau Perintah Barisan Nasional (BN).

    Tr Masa nuduh Perintah BN udah enda kiruhka hak peranak asal (Dayak) ke alai sida enggau naka ulih deka ngerampas tanah NCR.

    “Bukti kitai ngempu tanah NCR dipeda pengudah kitai menang pechara di Kort Tinggi enggau Kort Apil.

    “Tang sida nguna Kort Federal ngulihka tanah NCR kitai, ke alai atur tu besiping.

    “Kami enggai dibayar pampas tang dekaka tanah kami diberi pulai,”ku iya nambah.

    Nitihka penerang siku pengari ari Kpg Lebur, Jengga Jeli, sida dipejal nerima bayar pampas nya.

    Nyemaka Tr Masa, Jengga enggau nyemetak madah sida enggai nerima bayar pampas lalu enda deka nyerahka tanah pesaka nya.

    “Enti kami meri pinggai ngagai orang bukai, nama agi dikena kami makai,’ku Jengga.

    Iya nambah, enti Tabung Haji amat lurus deka mutarka pekara nya, sida patut berandau enggau peranak Lebur lalu ukai nganjung orang bukai nyadi orang tengah.

    kami semina ngemendar Tabung Haji nyuwa tanah kami ke alai semua tusun kereja nya meseti diadu enggau terang, tandu Jengga.

    Ngenang pekara ke sama, pengari Melikin, Micheal Luang bekunsi asai ati pengudah alah pechara tanah di Kort Tinggi bedau lama tu tadi.

    Iya ngelalau bansa Dayak ngambi ngembuan pengering ngenanka tanah diri.

    “Kenyau ari jeman PBDS, kitai sigi udah mantah Skim Muhibbah ti ngujungka Perintah BN enda nyadi ngemujur skim nya.

    “Diatu Perintah BN meri PL chara belalai ngagai kompeni. Sida ke bisi PL bisi kuasa tang kitai ke nyadi orang ngempu tanah lenyau kuasa,”ku iya.

    Berindik enggau nya, Micheal minta Dayak NGO baka ke SDNU, SIDS enggau gerempung bukai suah sereta berani agi bejaku ngenanka hak Dayak.

    Temuai dipebasa gempuru sehari nya ke mega ex-Sapit Kepala Menteri Dato Sri Daniel Tajem Miri, madahka Dayak sigi orang ngempu temuda kenyau bejeman ke udah.

    Perintah British kenyau ari taun 1881 ku Daniel, sigi udah ngakun tanah NCR ke alai adat enggau NCR sigi udah dikemeran sebedau penatai koloni.

    “Pemakai Menua enggau Pulau Galau nyadi kampung endur kitai Dayak begiga kayu ramu dikena berumah, ngasu jelu sereta begiga pemakai bukai,”ku Daniel.

    Gempuru sehari nya digulu urung 200 iku bansa Dayak ke datai ari Kuching, Serian, Melikin, Tapang Maong, Ensebang Pelaie, Kampung Lebur, Gedong, Kampung Bakong, Sri Aman, Melugu enggau Simunjan. #DayakDaily

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads


    Deka nemu berita benung #Viral ninting hari: