Header Ads

  • Berita Tebaru

    Peranak menua pesisir patut ngaul diri ba ekonomi digital

    KENANG: Rayong (baris belakang, tujuh kanan) enggau Nyalau (enam kanan) begambar bebala mayuh enggau raban tuai rumah.
    LUBOK ANTU: Kaban Kun­sil Nengeri (ADUN) Engkilili Dr Johnichal Rayong Ngipa dekaka peranak menua pesisir ngaul diri ba e-dagang.

    Berindik enggau nya, iya ngelalau bala tuai rumah ke baru tauka ke dichiri baru ny­adika chunto ngagai rayat, ke alai sida dipinta nemu pekara ke bekaul enggau ekonomi digital.

    Ekonomi digital diatu suah dikejaku ke alai Kepala Menteri Datuk Patinggi Abang Johari Tun Openg bendar meransang rayat ngaul diri ba ekonomi digital.

    Rayong madah semua orang ke ngembuan telefon pintar nadai napi penanggul ngaul diri ba ekonomi digital.

    Iya mega ngelalau bala tuai rumah ngambika nemu ba pekara internet ketegal pengawa beanjungka surat mudah sereta lengkas dikereja nengah email.

    Ijinsi perintah enggau ger­empung ke ukai dikuasa perintah (NGO) ku Rayong nguna email ba semua atur komunikasyen.

    “Aku deka kitai semua sedia diak atur nyiri tauka nyiri baru tuai rumah jemah ila deka dipadah nengah email enggau sekeda aplikasyen bukai ba media rama.

    “Berindik enggau nya se­mua meseti nyikap diri eng­gau penau enggau penge­landik internet munyika pinta kepala menteri,”ku iya.

    Iya mansutka jaku nya ba pengawa nyiri enggau nyiri baru bala tuai rumah di Lidong Bangat, Betong.

    Ba atur nya, Rayong nyuaka surat chiri ngagai 4 iku tuai rumah ke baru enggau 16 iku ke dichiri sekali agi.

    Ngenang kaul bukai, Rayong ngelalau rayat bediri tegap di belakang Abang Jo­hari ba atur tauka pengeran mai pulai hak sereta kuasa Sarawak nengah Sempekat 1963 (MA63).

    Bela datai Kaban Parlimen (MP) Lubok Antu Datuk William Nyalau Badak. #UtusanBorneo

    No comments

    Post Top Ad