Perintah nengeri ransing deka nempa modal mensia ti bekualiti - Berita Iban Online

Header Ads

  • Baru Nyadi

    Perintah nengeri ransing deka nempa modal mensia ti bekualiti

    KELAI: Manyin disempulang Fadzil sereta bala temuai dipebasa ke bukai ngelancharka ‘#Innovate Sarawak, Cabaran Reka Bentuk 2018’.
    Nengah bantu ti diberi ngagai palan pelajar dikena nangkup peminta orang gawa dalam industri di menua tu.

    KOTA SAMARAHAN: Perintah nengeri seruran ransing nyaup institusyen pelajar di Sarawak ba pengawa nempa modal mensia ti bisi kualiti enggau nangkup peminta industri.

    Menteri Pelajar, Sains enggau Pansik Teknologi Dato Sri Michael Manyin Jawong madah, antara pengawa ti dipejalai ngatur latih pengelandik ti engkeman ngagai bala nembiak.

    Ku iya, perintah nengeri mega nyaup raban institusyen pelajar ba pengawa nyediaka program ti komprehensif ungkup bala nembiak ngambika sida ulih nangkup peminta industri.

    “Kitai beratka pengawa mantu bala nembiak ngambika sida mujur lalu nyadi graduet ti kompeten sereta nangkup peminta industri.

    “Nya kebuah, bemacham pengawa enggau program nyengkaum latih disedia ungkup bala nembiak ngambi nyikap diri enggau penemu pengelandik ti dipinta industri,” ku iya.

    Iya mansutka jaku nya lebuh bejaku ba pengawa ngelancharka ‘#Innovate Sarawak, Cabaran Reka Bentuk 2018’ di Dewan Syarahan, Pusat Islam Tun Abang Salahuddin (PITAS) Universiti Malaysia Sarawak (Unimas) ditu, kemari.

    Ku Manyin nambah, dikena nyapai juluk nya, perintah nengeri begulai enggau Opis Menteri Pelajar Tinggi ngatur ‘#Innovate Sarawak, Cabaran Reka Bentuk 2018’ di baruh Inovasyen Malaysia, Edisi Khas Sarawak.

    Inisiatif tu diatur begulai enggau Unimas, Tabung Gagasan Ekonomi Bumiputera Sarawak (TEGAS) sereta Dream Cather begulai enggau bala bakih industri ke bukai.

    Berebak enggau nya, ku iya, dikena nangkup peminta makit kereja, bala nembiak patut nyikap diri empu enggau pengelandik diri nyengkaum ulih komuniskasyen jaku English enggau manah.

    “Ari pengelandik bejaku ti manah, kita deka ulih ngasuh pengaji andal lalu ngambi kita gawa enggau sida,” ku iya nambah.

    Sama bisi datai Sapit Mandal Canselor Unimas Profesor Mohd Fadzil Abdul Rahman sereta bala temuai dipebasa ke bukai. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads