Perintah seruran meransang program ti ngaul pupu bansa - Berita Iban Online

Header Ads

  • Baru Nyadi

    Perintah seruran meransang program ti ngaul pupu bansa

    Datuk Masir Kujat
    SRI AMAN: Perintah endang nyambut manah program ti dipejalaika sebarang opis perintah ba pengawa ngaul rayat nadai ngira bansa, menua enggau tikas ekonomi komuniti.

    Sapit Menteri Dalam Menua, Datuk Masir Kujat madah dikena nyapai tagit tu, semua raban komuniti sekalika ejensi perintah, sektor peribit, Gerempung Ukai Dikuasa Perintah (NGO), Badan Sahsiah, Gerempung Ngintu Pengelantang enggau gempung bekaul ba aktiviti komuniti meseti nangkup peminta ngenegapka penyerakup bansa nuju pengawa nempa Gagasan 1 Malaysia, Rakyat Didahulukan, Pencapaian Diutamakan.

    “Penyedar semua raban bansa mega beguna dikena nyapai juluk tu ngambika pengelantang enggau penyenang ke bisi diasai menua kitai enda deka lenyau ngapa,” ku iya.

    Iya ke mega Kaban Parlimen Sri Aman mansutka jaku nya lebuh bejaku bejadika Program Pemesai Begulai Enggau Rayat bepalan di Rumah Stephen Karin, Selepong Beranggan, Sri Aman semak ditu, apin lama ke udah.

    Nitih ku iya, kitai di menua tu patut ngenang laban rayat di nengeri Sarawak datai ari pupu bansa, ulih idup bebaik sereta seruran bekerejasama enggau pangan diri.

    “Kitai nyadi chunto ba pemaik semangat penyerakup ari suba dataika sehari tu. Kitai mega patut nyaga semangat penyerakup laban ari nya, kitai deka nyadi menua ti likun enggau lantang.

    “Aku ngarapka kerejasama, bebatak asur, pengelantang enggau penyerakup ti dikembuan kitai, enda mudah alah ngapa laban penguji. Tang, pemar ti deka datai nyadika peransang kitai begulai siru agi, angkun ke pengelikun enggau pengelantang, deka meruan bisi enggau diintu,” ku iya nyemetak.

    Nya kebuah, udah nyengala pemansang enggau penegap menua seruran bisi asil kerejasama semua bansa ti seruran gawa bebendar nentuka penyerakup enggau pengelantang bansa meruan diintu di menua tu.

    “Penegap tu nyadi ke pun pekara mantu kitai ngerembai dalam ekonomi. Kitai patut temegah ati ba pemanah pengerembai ekonomi dijapai dalam pengelikun enggau penegap menua kitai tu,” ku iya nandu.

    Ku iya, pengerichah agenda politik pemansang diatu, rayat patut meri sukung ngagai bala ketuai Barisan Nasional (BN) ngambika pengelantang enggau pemansang seruran bisi diasaika rayat, kelebih agi nengah Program Tranformasyen Perintah (GTP) enggau Program Tranformasyen Ekonomi (ETP) ke dipejalaika perintah BN.

    Sama bisi datai bala ketuai opis perintah sereta ketuai raban bansa ke bukai.

    Berebak enggau program nya, Masir bisi ngemendarka agih belanja penyampau RM20,000 dikena ngemanahka Bilik Stor JKKK Rumah Panjai nya seraya RM10,000 da agi ungkup JKKK lalu RM3,000 diberi ngagai Biro Indu rumah panjai nya. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads