PERKESO Sarawak nguna RM19.51 juta dikena mayar mayuh tulung - Berita Iban Online

Header Ads

  • Baru Nyadi

    PERKESO Sarawak nguna RM19.51 juta dikena mayar mayuh tulung

    SELAMAT HARI KRIMAS:Riot begambar bebala mayuh enggau penerima tulung PERKESO ke dikanggau sama enggau ngerami pengerami Krismas nya, kemari.
    KUCHING: PERKESO Negeri Sarawak udah ngena belanja sepenyampau RM19.51 juta ti mungkur 2,555 kes ungkup dalam timpuh kepenudi bulan September 2017.

    Menteri Penguasa Pengereja Pengawa, Dato Sri Richard Riot Jaem madahka penyampau belanja sereta kes nya ungkup mayuh bengkah tulung ke udah diproses.

    “Ba timpuh kepenudi September 2017, PERKESO Nengeri Sarawak udah ngena belanja sepenyampau RM19.51 juta ti mungkur 2,555 kes ari mayuh bengkah tulung ke udah diproses baka ‘Tulung Tachat Sementara, Tachat Seumur Idup, Tulung Orang Ditupi’ enggau ke bukai,” ku iya.

    Riot mansutka pekara nya lebuh bejaku nyerumba Pengerami Ngintu Krismas Begulai Enggau Penerima Tulung PERKESO 2017 ke diatur ba sebengkah hotel ditu, kemari.

    Berebak enggau tu Riot mega nesau raban pengaji enggau pengereja pengawa ngambika ngerejista diri nyadi pemayar awakka ulih dijaga tauka dilindung nyema bisi pekara ke ke enda disadang nyadi.

    Penyampau bayar ti digumpul Nengeri Sarawak taun tu nyentuk 30 November 2017 iya nya bisi RM6.5 juta.

    “Penyampau pengaji ti chakah mayar nyentuk September 2017 di Nengeri Sarawak bisi 37,007 pengaji lalu penyampau pengereja pengawa aktif ti dilindung dalam timpuh ke sama iya nya 453,102 iku,” ku iya.

    Ba taun 2016 dalam timpuh ke sama bisi 36,860 pengaji ke chakah mayar sereta bisi 470,694 iku pengereja pengawa aktif ke dilindung tauka dijaga.

    Nitihku iya kenyau ari opis PERKESO ditumbuhka di Serian, naka taun 2017 bisi 1,125 pengaji udah ngerejista diri enggau PERKESO.

    Kelimpah ari nya lebuh ke ngenang pengerami Krismas Bersama Penerima Faedah PERKESO 2017, iya madahka nya sebengkah tanggungpengawa rama korporat (CSR) ti dipejalaika PERKESO.

    “Nyerumba pengerami seharitu tu kitai bisi nyerahka chek ngagai enam iku penerima ke patut. Lalu penyampau semua bayar tulung mata duit ke diberi tu iya nya sepenyampau RM110,146.07 nyengkaum empat buah kerusi roda ke diberi ngagai empat penerima faedah PERKESO.

    “Nengah program CSR tu mega, bisi 90 iku penerima dikanggau enggau ngerami pengerami tu.

    “Aku mega enggau gaga ati mega nyuaka pemeri 40 hamper sereta pemeri ‘duit angpow’ ngagai indai tunggal enggau anak, penyaga sereta anak patu balu ke bisi datai ngagai pengerami tu,” ku iya.

    Sama datai enggau ngerami pengerami Krismas nya kemari, Ketuai Sekretari Opis Menteri Penguasa Pengereja Pengawa Menuusia (KSM) Dato Dr. Mohd Gazali Abas, Sapit Ketuai Sekretari (Dasar) KSM Amir Omar, Sapit Ketuai Eksekutif (Operasi) PERKESO John RIba Marin, Sapit Ketuai Eksekutif (Korporat) PERKESO Datin Azlaily Abd Rahman sereta Direktor PERKESO Negeri sarawak Philip Sangkan enggau ke bukai. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads