PKDBS sepenemu enggau NGO Dayak bukai minta hak MA63 terus ditagih - Berita Iban Online

Header Ads

  • Baru Nyadi

    PKDBS sepenemu enggau NGO Dayak bukai minta hak MA63 terus ditagih

    Pertubuhan Kebajikan Dayak Bersatu Sarawak (PKDBS)
    SIBU: Pertubuhan Kebajikan Dayak Bersatu Sarawak (PKDBS) seperau enggau gerempung ukai perintah (NGO) Dayak ke bukai ditu bela ngandalka perintah nengeri chakah sereta ransing nagih hak baka ba Sempekat Malaysia 1963 (MA63).

    Presiden gerempung tu, Datuk Joseph Unggu madah, sida pechaya Kepala Menteri Datuk Patinggi Abang Johari Tun Abang Openg nyadi ketuai ti ulih ngintu hak rayat nengeri tu.

    “Gerempung kami ti sebagi ari gerempung Dayak ke bukai nyukung amat enggau pengeransing ke udah dibantai Abang Johari sentang pengawa iya bekaul enggau isu MA63 tu,” pia ku iya madah maya aum media.

    Dulu agi ari nya, iya betuaika aum keterubah Koperasi Agrobiz Jaya Bhd ke diatur ba sebengkah hotel ditu, kemari.

    Ketegal nya mega, Joseph maya tu madahka gerempung sida ningkah amat penemu ke dibantai Speker Kunsil Menua Tan Sri Pandikar Amin.

    “Kitai bela ngenggaika penemu Pandikar ti ngubah sejarah iya ke endang udah ba struktur MA63.

    “Perintah nengeri kitai mega udah nganjung deligit ngagai London beratika baru dokumen MA63 sebedau tu,” ku iya madah.

    Berebak enggau tu mega, iya bela bisi ngelansa sentang isu Pemakai Menua enggau Pulau Galau (PMPG).

    Iya madah, sida pechaya perintah nengeri semampai ngemeratka isu tanah adat Bumiputera (NCR) tu lalu udah nyiri Sapit Kepala Menteri Datuk Amar Douglas Ugah nyadi ketuai komiti mansik isu PMPG.

    “Baka Dayak bukai, PKBDS andal perintah nengeri ti dipegai Abang Johari lalu Ugah nyadi ketuai komiti mujur mai pemutus ti engkeman mutarka dua bengkah isu tu.

    “Nya alai, pengeransing perintah bejalaika pengawa mansik isu tu patut disukung ngambi pulaika pemanah ngagai asil pansik nangkan ke tu ila,” pia ku iya madah baru.

    Bekaul enggau PKDBS, Joseph madahka gerempung sida semampai besedia nyaup bansa Dayak ti bisi ditinggang tauka napi penusah enggau penanggul.

    “Kitai endang beamat-amat deka nyaup komuniti Dayak nyengkaum semampai nyediaka diri nyema nemu berita Dayak ke bisi penusah.

    “Kita tau ngelawa pampang opis kami baka di Sitak Tengah ditu bisi di Sibu Jaya lalu pia mega bisi opis di Miri,” ku iya nerang. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads