Produk ari Maludam bisi pengulih ngerembai ngagai makit menua luar - Berita Iban Online

Header Ads

  • Baru Nyadi

    Produk ari Maludam bisi pengulih ngerembai ngagai makit menua luar

    Susan Chemerai Anding
    MALUDAM: Pedagang mit enggau jelan pemesai di kandang menua diperansang nyaup perintah nyual produk dikeluarka pelilih menua tu ba pengawa ngelakuka pelilih tu ngagai komuniti luar.

    Sekretari Politik Kepala Menteri, Susan Chemerai Anding madah produk dikeluarka pelilih menua tu bisi pengulih tinggi dijual ngagai menua luar ngambika dikelala komuniti di luar.

    “Aku empu beratika sitak Maludam tu, bisi mayuh pedagang mit di genturung pendiau enggau jelan pemesai di kandang menua tu bisi pengulih kediri empu nyual produk dikeluarka sida empu, pansut ari sitak Maludam tu.

    “Chunto pemadu semak, kuih kering tauka biskut kering asil ari peranak ditu ukai semina ulih dijual di genturung pendiau aja, tang mega ulih dijual di sitak menua bukai baka Betong, Sarikei, Sri Aman, Kuching enggau ke bukai,” ku iya.

    Iya mansutka jaku nya lebuh bejaku ba pengawa nutup bejadi Program Kaul Rat Raban Indu diatur Komiti Pemansang Raban Indu enggau Ruang Bilik (MPWK) Parlimen Batang Lupar bepalan di Balai Sri Budiman, Sekulah Primari (SK) Maludam semak ditu, kemari.

    “Nyema produk ke bansa tu dibai pansut ari sitak Maludam, aku pechaya mayuh orang deka ngelala pelilih Maludam, lalu komuniti ari luar sitak Maludam tentu deka datai kitu ngiga produk ti diasilka menua tu.

    “Ari pemayuh tubuh sida ke datai kitu, tentu mega ekonomi komuniti kitai kelebih agi ekonomi sida indai, apai, tauka pedagang kitai deka nambah, pia mega iya ulih ngemansangka menua tu ila,” ku iya nerang silik.

    Berebak enggau nya, Susan mega meransang pedagang Program Inap Desa tauka Homestay di sitak Maludam ngambika seruran ngemanahka Inap Desa sida empu dikena matak penatai mayuh agi pengusung ari luar sitak Maludam.

    Ba pekara tu, iya meransang pedagang Inap Desa ditu seruran ngemeratka pekara pemeresi enggau ke bukai sereta meri servis pemadu manah ngagai bala penguna sida.

    “Pekara pemeresi patut diberi pemerat lalu nyema Inap Desa kita beresi, tentu Inap Desa kita deka seruran ditapatka bala temuai sereta mega servis patut manah kelebih agi ari sukut rega patut ulih dibayar,” ku iya.

    Berebak enggau nya, Susan mega minta peranak ditu ngerebut awka ekonomi digital ti dipejalaika perintah ba pengawa mantu komuniti di menua pesisir.

    “Perintah dekaka komuniti menua pesisir ngeribut awak ngena ekonomi digital ti dipejalaika perintah. Ari pemisi ekonomi digital tu, komuniti kitai ulih nyual produk sida empu nengah media rama tauka dikelala enggau dagang ari rumah,” ku iya madah silik.

    Nya alai, rebut semua awak ke bisi ti udah disediaka perintah ba pengawa mantu nambahka penatai pemisi rayat kelebih agi sida ke diau mendam di kandang menua pesisir.

    Sama bisi datai Pemesai Penerit Adat Opis Pelilih Mit Maludam, Noraini Edi, pengari Kepala Pengajar SK Maludam, Bolkiah Brahim, Penghulu Maszain Ahmad Rais, Chairman MPWK Parlimen Batang Lupar, Zuraida Julai sereta bala bukai.

    Program nya mega dirichah enggau Pekit Ngelagu Nitihka Penau Diri Empu, Pekit Berapi, Pekit Nyido Mua, Pemerindang Beraban, Chabut Tikit Benasit enggau Mandangka Pengawa Manduk Bubur Lambuk. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads