Projek pemansang patut diterang enggau betul - Berita Iban Online

Header Ads

  • Baru Nyadi

    Projek pemansang patut diterang enggau betul

    Datuk Masir Kujat
    Semua ketuai raban bansa patut bekerejasama rat enggau perintah ke pemaik nembiak redak diri.

    SRI AMAN: Genap renggat ketuai raban bansa nadai ngira Tuai Rumah, Penghulu, Pemancha enggau Temenggung dipinta terus meri kerejasama rat ngagai perintah ungkup pemansang rayat di menua ke dipegai sida.

    Tu berindik ari bisi mayuh projek pemansang benung dipejalai perintah patut ditemu sereta diterang ngagai rayat ngambika sida enda dikelaung ari ngasaika perengka guna nya, pia ku Sapit Menteri Dalam Menua, Datuk Masir Kujat.

    Iya ke mega Kaban Parlimen (MP) Sri Aman mansutka jaku nya lebuh bejadika Program Pemesai Begulai Enggau Rayat bepalan di Rumah Sawai Egoh, Bukit Balau, Bakong Sri Aman semak ditu, pagi ensanus.

    Ku iya, bala ketuai raban bansa patut bejalaika pangku pengawa beguna endar naburka penerang betul sereta lurus baka projek pemanang di menua ke dipegai sida,” ku iya.

    Pia mega ku iya, rayat enda patut dikelaung ari nerima projek pemansang ari perintah.

    Nya kebuah pangku pengawa sereta tanggungpengawa ketuai raban bansa endang dipinta meri penerang pasal projek pemansang ke benung dikemansang tauka ke bisi diatu deka seruran diasaika sida.

    Taja pia, iya mega nyemetak madah tetiap penerang bekaul enggau pemansang ke diberi ngagai rayat enda dibalut penanggul diri empu tauka penanggul bukai laban deka mai pangka enda manah ngagai rayat.

    “Aku ngelalau ngambika tetiap penerang bekaul enggau pemansang patut disukung enggau pekara nyata lalu ketuai raban bansa patut ngiga alternatif pemadu manah, ambika chunto enggau ngatur pengawa begulai enggau ejensi perintah ngambika tetiap penerang nya enda ngasuh saru penemu,” ku iya nandu.

    Kelimpah ari nya, iya ngelalau anang sesekali ngena jalai muntang, iya nya nengah bala penyakal dikena mutarka isu tauka penanggul ke bisi nyadi laban iya irauka ulah bala penyakal ti dikumbai baka ‘Beambi Ulih’, tentu deka nguntungka sida.

    “Patut dikeingat ketuai raban bansa nyadi ‘orang tengah’ nyadi mata enggau pending perintah ke alai sida patut ngeliahka diri ari diasut bala penyakal ba isu pemansang sereta mutarka penanggul ke bisi nyadi,” ku iya madah nyemetak.

    “Nyadi pengari rayat, aku enggaika raban nadai tanggungpengawa nyalahka perintah nyema isu nya dikerembaika bala penyakal ngena chara enda manah.

    “Udah nyadi tanggungpengawa aku sereta semua ketuai raban bansa bela bekerejasama sereta nyaup pangan diri nentuka rayat patut nerima nitihka peminta sida. Kena jalai ti betul lalu anang kelalu ngandalka penyakal mutarka penanggul kita laban ulah penyakal disempama baka semina gawa ngudahka aja,” ku iya nerang silik.

    Sama bisi datai rambau atur program nya bala ketuai raban bansa ke bukai.

    Berebak enggau program nya, Masir udah ngemendarka agih belanja ungkup taun 2018 penyampau RM30,000 ngagai 13 pintu bilik rumah panjai nya seraya bela penyampau RM5,000 diagih ungkup JKKK enggau Biro Indu sida. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads