Header Ads

  • Berita Tebaru

    Putarka ‘konflik’ dikena ngerampas penuduk Sibu enggau Lanang

    Dato Sri Dr Stephen Rundi
    Nengah kerejasama semua parti Barisan Nasional, enda patut penuduk nya enda ulih ambi pulai baru, ku Dr Rundi.

    SIBU: Parti Sa’ati Rayat Sarawak (SUPP) enggau Parti Rakyat Bersatu (UPP) patut mutarka ‘konflik’ ngambi ulih ngerampas penuduk Parlimen Sibu enggau Lanang ari penyakal maya Pengawa Bepilih Besai (PRU) deka datai.

    Sekretari Besai Barisan Nasional (BN) Sarawak, Dato Sri Dr Stephen Rundi madah, iya setuju enggau penemu Kepala Menteri Datuk Patinggi Abang Johari Tun Openg ti beratika BN ngembuan peluang besai ngambi pulai dua penuduk nya.

    “Aku setuju enggau Kepala Menteri, asal SUPP enggau UPP sedia mutarka konflik lalu bekerejasama ngerampas penuduk Sibu enggau Lanang,” ku iya ke mega Menteri Utiliti.

    Chalun bepenau SUPP ungkup penuduk Parlimen Lanang, Joseph Chieng mega andal penuduk nya ulih diambi pulai baru ari penyakal. Nengah kerejasama semua komponen parti BN ku iya, enda patut kededua penuduk nya enda ulih ambi BN.

    “Nyema dichalun, kita deka nyadi chalun BN. Nyema kita menang, tu mandang pengawa penyerakup tegap dalam empat parti komponen enggau ke bukai.

    “Sigi ulih kitai ngambi baru penuduk Lananang bepelasarka penemuai aku ngagai sekeda rumah panjai, lalu rayat asa laban kaban parlimen penyakal enda kala ngabas sida.

    “Rayat chukup andal serak tu sida deka ngembuan pengari rayat ari BN,” ku Chieng ke mega Ketuai Nembiak SUPP Bukit Assek.

    Chairman Parti Rakyat Sarawak (PRS) Pampang Dudong, Sempurai Petrus Ngelai madah, sukung mensia mayuh ngagai BN majak betambah sepengudah pengawa bepilih besai nengeri ke udah.

    “Polisi ke dipungkal niang Tok Nan enggau diatu ditampung Kepala Menteri ke diatu, mandangka BN chukup lurus ati nyengkaum ngagai komuniti China.

    Nengah ngaku Setipikit Peresa Bersepadu (UEC) ari perintah nengeri, ku mandangka perintah BN endang pilih pemadu manah ungkup pengundi ba Lanang enggau Sibu.

    “Ungkup perintah besai, pengawa ngaga jalai besai Pan Borneo endang sebengkah kebuah tambah bala pengundi patut milih BN.

    “Nama utai ke beguna diatu iya nya pengawa milih pengari ba kededua penuduk nya lalu nyeliahka sebarang konflik nyadi entara komponen parti BN, laban nya ulih ngelemika semua BN,” ku iya.

    Sempurai mega madah, orang ke deka nyadi chalun BN ungkup Sibu enggau Lanang sigi patut ngembuan perambu ungkup mengeri Sibu.

    “Kitai enggai pengari rayat tu semina pandai bejaku, tang patut nemu ngatur pemansang enggau visyen ungkup rayat ti beratika pengawa sida dalam timpuh lima taun ke deka datai,” ku iya. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads


    Deka nemu berita benung #Viral ninting hari: