Header Ads

  • Berita Tebaru

    Raban nembiak patut nyaga ulah diri sereta seruran bedisiplin

    UNGKUP KENANG: Nanta (lima kiba), Elvis Didit (empat kiba) enggau Angelina Celestine Ujang (enam kiba) begambar bebala mayuh enggau pesereta ti udah nyereta kus sehari nya.
    KAPIT: Sapit menteri Pemansang Menua Psisir enggau Kandang Menua Datuk Alexander Nanta Linggi ngelalau raban nembiak ngambika nyaga ulah diri sereta ngembuan disiplin dikena nyeliahka sida ari isu penyalah rama baka ngandung maya umur biak enggau gian dadah.

    “Perintah endang ngemeratka pekara ti bekaul ngandung maya agi biak enggau gian dadah ba raban nembiak entara umur 14 nyentuk 18 taun. Ejensi perintah udah ngelangkar mayuh program sereta aktiviti dikena meri penyedar ngagai nembiak ngambika enda ngaul diri dalam penyalah rama ti deka ngeruga pengidup sida dudi hari,” ku Nanta nyemetak lebuh ti bejadika Pengawa Nutup ‘Kursus Nur-Sejahtera Remaja Peringkat Kapit’ ke udah digaga di Hotel Meligai ditu.

    Program sehari tu ke diatur Opis Menteri Orang Indu, Ruang Bilik enggau Pemansang Komuniti udah digulu 40 iku raban nembiak ke beumur entara 14 nyentuk 18 taun mega udah betuaika Datin Angelina Celestine Ujang.

    “Seruran meri pemerat ngagai pelajar dikena nyikap diri jemah ila. Lebuh besekula, tanggungpengawa kita semina belajar enggau naka ulih ngambika bulih pemutus ti nyulut ba sekula sereta peresa perintah. Kita tau bebakih, tang anang guai nanggam pengerindu laban tu bedau maya nya agi,” ku Nanta meri jaku lalau.

    Datin Angelina mega bisi nerangka batang tuju kus nya iya nya dikena meri penyedar sentang pekara ti ngirauka ati semua piak iya nya ngandung maya umur biak enggau gian dadah. Ku iya tu deka ngeruga institusyen ruang bilik, kaul rama sereta penamah ulah ke ditempa dalam komuniti. Iya mega nambah taja nadai kes muai anak, tang peratus bacha pansik kes ngandung maya umur biak chukup ngirauka laban sida mya umur tu agi bedau sedia napi pekara tu.

    “Nundaka statistik, Kapit ngembuan bacha ti tinggi ba kes ngandung maya umur biak iya nya 14.1 peratus ba taun 2016. Tu ditangkan ke Sarikei 9.1 peratus, Betong 8.5 peratus, Bintulu 8 peratus enggau Sibu 7.8 peratus.

    “Ari pratus nya, Kapit bisi 232 kes ari 2481 kes ke dirikod dalam nengeri tu ba taun 2016. Pekara tu siti pekara ti berat laban kes ngandung maya umur biak tu ngaul nembiak indu ke beumur baruh ari 20 taun lalu sida tu bedau kawin. Tu mega lalu ngaul isu rama sentang pekara pelajar, pengelikun enggau pengerai, status kawin, jalai pengarap sereta peranak, enggau ke bukai,” ku iya nyemetak.

    Ba program tu, iya udah meri besai terima kasih ngagai PEMADAM Bagi Menua Kapit, Opis Polis sereta ejensi ti bekaul ke udah nyaup ngemujurka program tu.

    Temuai bukai ke bisi datai iya nya Pemesai Pelilih Kapit Elvis Didit ke mega chairman PEMADAM Kapit, OCPD Kapit DSP Freddy Bian, pemesai khas Nanta, Ambrose Abong, Penghulu Sia Shui Poh sereta ke bukai. #UtusanBorneo

    No comments

    Post Top Ad