Raban penyelamat dilalau ngambika chakah agi meri bantu - Berita Iban Online

Header Ads

  • Baru Nyadi

    Raban penyelamat dilalau ngambika chakah agi meri bantu

    Datuk Amar Doughlas Uggah Embas
    Raban tu nyadi pengari perintah patut meri bantu sereta servis ti manah enggau jampat ngagai rayat ke ditinggang penusah.

    SPAOH: Pengeransing sida raban penyelamat enggau pengintu pengelantang dalam nentuka tetiap pengawa ke patut digaga enggau lengkas lebuh ti nyediaka servis maya penusah ngenyit ke nyadi di nengeri tu endang diperansang lalu tu ulih meri empas positif ngagai pengelantang rayat.

    Sapit Kepala Menteri Datuk Amar Doughlas Uggah Embas sekali agi madahka ngagai tetiap Komiti Penusah Ngenyit di nengeri tu ngambika seruran besedia enggau semua pengawa ke ulih meri pemaik ngagai rayat ti ditinggang penusah enda ngira dini pan sida diau lalu nentuka bantu ulih diberi enggau lengkas.

    “Perintah endang siru enggau penanggul ke ditapi rayat kelebih agi lebuh kitai deka nemu tetiap pekara ti diguna rayat, kitai mega ngarapka timbal positif ari peranak ti ditinggang penusah ngambika ulih nentuka kuing bantu ti seriris enggau guna pengidup ti begulai enggau pangan diri lalu naka ulih mutarka penanggul nya ungkup pemaik sereta pengelantang semua.

    “Pia mega lebuh kitai ti bebendar mutarka penanggul ti ditapi berindik ari penusah ngenyit ti nyadi baka ampuh bah enggau tanah tusur baka ti nyadi ditu ke nyau ngeruga pengidup peranak di kandang menua tu,” ku iya.

    Iya madah munyi nya lebuh ti ngabas kandang menua ke udah ditinggang penusah ngenyit ba Betong enggau Spaoh, ditu.

    Ku iya nambah, perintah endang randaka bantu ti jampat baka meresika semua sistem parit ke bisi lalu ngelangkar ngambika sistem alir parit digaga enggau manah dikena nyeliahka pekara ke sama nyadi baru.

    “Aku mega minta Opis Kaunsil Pelilih Betong (MDB), Opis Parit enggau Entali Ai (DID) enggau Opis Kereja Raya (JKR) ngambika ngelangkar siti pelin ke patut dipejuraika ngagai aku sebedau ujung taun tu ngambika kitai ulih ngiga agih belanja dikena mutarka penanggul tu,” ku iya nyemetak.

    “Beserimbai enggau nya, kitai mega ngarapka kandang menua ke bukai di nengeri tu ke udah napi penusah ke sama mega bela masik lalu kitai ngarapka Komiti Ngatur Penusah Ngenyit di tetiap bagi menua enggau pelilih nengeri tu ngambika ulih mantaika ngagai perintah nengeri bakani pekara tauka penusah tu ulih diputar ngambika enda nyadi agi,” ku iya nandu.

    Uggah ke mega chairman Komiti Penusah Ngenyit Nengeri puas ati enggau pengawa ke udah digaga semua piak dalam meri bantu ngagai sida ti ditinggang penusah baka di Rumah Dau, Temedak ke udah putus jalai penyambung ketegal ti runtuh berindik ari ujan ti bangat nyadi.

    “Kitai mega bisi dipadah iya nya jalai ke putus tu ulih digaga dalam tipuh ke pandak lalu semua perengka ke dikena ngaga jalai tu udah dianjung ke palan nya,” ku iya.

    Iya mega udah ngelalau peranak di kandang menua ti baruh kelebih agi maya musim ai pasang besai sereta ujan tu ngambika ngadang napi sebarang penusah ti deka nyadi.

    “Seharitu mega agi bisi pasang besai lalu diekarap peranak di kandang menua ti baruh ba selampur Sarawak ngambika bejejaga lebuh ti betapatka ujan bangat ke deka ngujungka ampuh bah,” ku iya.

    “Berindik ari ny, aku minta semua Komiti Pengatur Penusah Ngeyit di tetiap pelilih ngambika ngadang napi sebarang penanggul ke deka nyadi berindik ari fenomena tu ke ulih ngujungka pekara ti enda disadang nyadi kelebih agi Raban Soldadu Malaysia (ATM), Opis Bomba enggau Penyelamat (JBPM) enggau Raban Pengintu Pengelikun Periman Malaysia (APM) ngambika mantu enggau lengkas lebuh sida diguna,” ku iya nyemetak.

    Beserimbai enggau nya, Uggah udah madahka agih belanja sepenyampau RM70,000 ngagai JKR ke alai RM30,000 dikena ngemanahka jalai ti putus nya di jalai Temedak lalu RM40,000 ungkup siti palan ti enda likun di kandang menua Mupoh, Layar.

    Taja pia, sida agi nganti langgur sereta perambu ari MDB dikena meresika sistem parit ba Spaoh. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads