Raban S4S mejah jaku emba DPM - Berita Iban Online

Header Ads

  • Baru Nyadi

    Raban S4S mejah jaku emba DPM

    Peter John anak Jaban
    KUCHING: Raban Pro-Autonomi Advokasi, Sarawak 4 Sarawakians ngenggaika jaku emba Sapit Menteri Besai (DPM) Datuk Seri Ahmad Zahid Hamidi ti madahka orang ke ngena slogan ‘Sarawak 4 Sarawakians’, takut negika hak sida ari baruh konstitusyen.

    Ketuai De-facto gerempung tu, Peter John anak Jaban madahka jaku emba DPM nya nadai dalam Konstitusyen ti madahka jaku ‘Sarawak 4 Sarawakians’ nya salah.

    “Raban tu semina ngena platform tu bejaku ngarika rayat Sarawak, lalu pelaba aku baka nya mega peragam ati rayat Sabah.

    “Enti nitihka Artikel 10 ari Konstitsyen Perintah Besai nyaga hak tetiap iku rayat menua tu, sida enda ditagang peragam ati sida, kelimpah ari nya, nyaga pengelikum mensia mayuh sereta menua tu.

    “Kami nanggi Sapit Menteri Besai meri chunto ngagai kami nyema kami kala ngaga penyalah ke tau mai penyarut ngagai rayat sereta menua tu. Nyema iya ngumbai Sempekat Malaysia 1963 (MA 1963) nya tau mai penyarut ngagai menua tu, reti nya penemu iya pandak endar pasal MA 1963,” ku Peter madah nengah whatsapp nuju Bilik Berita, kemari.

    Ku iya baru, nyema jaku Sapit Menteri Besai nya munyi nya, ti madahka pengawa S4S bejakuka hak Sarawak nitihka MA1963 tau di kumbai ngemba mensia mayuh, reti nya jaku ti dipansutka Ahmad Zahid nya mega tau dipadahka ngemba Perintah Menua Sarawak ti ngembuan peminta ke sebaka enggau S4S.

    “Nyema jaku ngemba kami, reti nya sama mih nya ngemba Perintah Nengeri Sarawak laban pekara ti dikemeratka kami sebaka, semina perintah udah jauh agi singkang nyentuk mansang ke London ngiga dokumen pasal MA 1963.

    “Kami rayat Sarawak beterima kasih ngagai perintah nengeri ti ngemeratka rayat nengeri tu kelebih agi ngagai Kepala Menteri Datuk Patinggi Abang Johari Tun Openg,” ku iya.

    Kelimpah ari nya, Peter madahka DPM patut meretika peragam ati rayat nengeri tu.

    “Baka ni ku penemu iya ti udah mansutka jaku emba deka nangkap tetiap iku rayat menua tu ke bisi ngena stiker S4S tauka nangkap tetiap iku rayat Sarawak ke ngena baju-T ke bisi logo S4S?

    Berebak enggau nya, Peter baru madahka sebedau Pengawa Beplih Besai Menua (2016), nitihka ‘Merdeka Centre Poll’ urung 47 peratus ari penyampau mensia di nengeri tu nyukung S4S, lalu 85 perati betatika pemerat autonomi ungkup menua Sarawak, ku iya.

    “Reti nya, DPM ngumbai tetiap iku orang ke ngena slogan S4S nya orang ke salah, ketegal baju-T Kuning nya aja? Sinu endar mih enti iya ngaga bansa nya, laban enda meretika pemerat rayat nengeri tu.

    “Sarawak 4 Sarawakians mantaika runding sereta penemu rayat Sarawak, iya ukai digaga,” ku iya.

    Lebuh ke ngenang pasal penemu Speaker Dewan Rakyat, Pandikar Amin Mulia, Peter madahka Pandikar semina mangku pengawa nyadi Speaker, lalu iya orang ke patut ngembuan runding neutral, ukai orang ti ngemelika diri ke deka nanggi Kepala Menteri Sarawak ti seruran kiruh ngemansangka nengeri tu.

    “Nama reti bukai Pandikar ngaga baka tu, semina deka ngelakuka bup iya aja. Ukai penduduk Pandikar meri pemutus pasal MA1963.

    “Nya alai, nadai chara bukai dipinta kami, S4S minta Opis Bangsa-bangsa Bersatu (UN) tauka Kort Entarabansa enggau semua orang ke ngempu sain dibantaika ngambika penanggul tu tau diperatika,” ku iya. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads