‘Research Development Council’ ungkup aktiviti R&D di Sarawak - Berita Iban Online

Header Ads

  • Baru Nyadi

    ‘Research Development Council’ ungkup aktiviti R&D di Sarawak

    RAMI: Sebagi ari bala ke bisi datai ngulu pengerami makai lemai.
    KUCHING: Perintah deka numbuhka ‘Research Development Council’ enda lama agi dikena beratika aktiviti pansik enggau pemansang (R&D) di nengeri tu.

    Gempung baka Sarawak Biodiversity Centre enggau palan pelajar tinggi di nengeri tu deka gawa rat begulai enggau komiti baru ti dilempaika pengawa nentuka pansik dipejalaika memanah sereta asil iya dikena ungkup pemaik.

    Perintah nengeri seruran nerima penemu baru ari mensia mayuh pulaika pemaik raban ke bukai.

    Penemu inovatif nengah pengawa pansik enggau pemansang mega diterima, pia ku Kepala Menteri Datuk Patinggi Abang Johari Tun Openg nengah jaku dibacha Sapit Kepala Menteri Datuk Amar Douglas Uggah Embas rambau atur pengerami makai lemai ngempuruka baru ex-Staf Sarawak Land Development Board (SLDB) di sebuah hotel ditu, malam Hari Minggu.

    “Dikena bejalaika pansik enggau ngiga jalai pemansang ukai pengawa ti mit belanja tang iya udah dikereja lalu dipelanja nentuka nilai tambah ba bahan mata. Lalu iya tau meri asil besai dibanding semina eksport bahan mata baka kayu batang, gis enggau minyak,” ku Abang Johari.

    “Nya kebuah ba pengawa ngererak kabinet, aku udah numbuhka Opis Menteri ti deka ngintu pansik teknologi enggau sains ngambi beratika R&D nengah Research Development Council ti deka ditumbuh enda lama da agi,” ku iya.

    Abang Johari meransang bala ex-Satf SLDB begulai sama enggau penau sereta peneleba sida nyaup sereta nambahka produktiviti betenam betupi di nengeri tu.

    Uggah udah nya muji ex-Staf SLDB ti udah numbuhka koperasi enggau 400 iku kaban rejista, bejalaika sekeda pengawa rama pulaika pemaik ex-staf sereta mega mensia mayuh.

    Koperasi di baruh nama KOSEM99 (Cooperative Semangat Sembilan-Sembilan) udah ngatur sekeda projek mit lalu siti ari nya, kus ti ngemeratka pekara organik enggau pengawa nanam sayur enggau nadai ngena bahan kimia di Miri. Kus tu udah dipejalaika siku ari ex-staf SLDB, Awang Othman.

    KOSEM99 mega udah ngepunka pengawa ba terapi pengerai bekenaka katil infra-red Korea, dikumbai Ceragem.

    Kelimpah ari nya, bala kaban koperasi tu mega keran ba pengawa ngasilka pemakai jelu ngena daun sawit kaban sida ulih meda tu deka ngemai dagang besai ngagai sida dudi hari.

    “Daun sawit ngelama tu enda diguna lalu ditejuka pia aja tang nyema sida nginjin nyadi barang baka pemakai jelu, sida ulih nyapai rega ke manah. Nyema kita ulih nambahka rega ba daun sawit, aku pechaya iya ulih meri penguntung ngagai mayuh orang kelebih agi sida ke nanam sawit.

    “Gaya pengawa R&D tu nyadi pekara dikedeka kitai dikena menuhka industri kitai enggau bala pedagang. Aku besampika semua kita, ex-Staf SLDB, enggau bala pekereja teulihka pemujur ba tetiap pengawa dikereja kita mantu nambahka produktiviti kitai,” ku Abang Johari dalam jaku dibacha Uggah, ke mega Menteri Betanam Betupi Moden, Tanah Adat enggau Pemansang Kandang Menua.

    Sama bisi datai Penyanding Penemu Pengatur Ahmad Ebon, chairman pengatur Razali Jahari sereta ex-Chairman SLDB, Wan Habib Mahmud, 82 taun.

    Sida tu antara 230 iku ke bisi datai malam nya. Sekeda ex-staf udah ngaul pangan diri kenyau ari betemu kepenudi 40 taun ke udah. Tebal agi umur sida diatu nyau manggai 60 enggau 70 taun.

    Bala sida udah ngatur pengerami makai lemai gempuru baru keterubah kena 9 September 2017 di Miri.

    Ari 400 iku kaban, 100 iku ari sida ex-Staf serakup SLDB udah mati, nya kebuah malam nya, sida diarika bala diri sebilik ke agi idup ngulu pengerami lemai nya. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads