RS1 perambu pemansang inklusif ungkup menua Sibu - Berita Iban Online

Header Ads

  • Baru Nyadi

    RS1 perambu pemansang inklusif ungkup menua Sibu

    Datuk Andrew Wong
    SIBU: ‘Rancangan Sibu’ 1 (RS1) nyadi perambu pemansang lima taun inklusif ungkup kandang mengeri enggau menua pesisir Sibu.

    Chairman RS1, Datuk Andrew Wong madah, agi tubah orang ti saru penemu pasal RS1 lalu nyangka perambu pemansang tu semina ungkup mengeri Sibu aja.

    “Anang saru penemu, Mayuh ti saru penemu pasal RS1. Bisi mega orang nanya ngagai aku bisi tauka Perambu Menua Pesisir Sibu.

    “Tu ukai Perambu Mengeri Sibu. Tu perambu ungkup serata Sibu, ungkup menua pesisir sereta mega mengeri Sibu,” ku iya lebuhka bejaku rambau Program Begulai Enggau Komuniti@Tanjung Bekakap di Rumah Joseph Jarrau, malam kemari.

    Sama bisi datai iya nya Temenggung Stanley Geramong, Pemancha James Semilan, Penghulu Jeffery Sut, Penghulu Evelyn Holly Sebom, Sapit Chairman RS1 Andrew Shilling, chaln ditaga ulih menang UPP ungkup penuduk Parlimen Lanang Andrew Ting sereta bala bukai. Program nya bela 300 peranak ari Tanjung Bekakap, Sungai Tebelian, Sungai Apong enggau Sungai Melanggan.

    Andrew Wong ke mega nyadi chalun ditaga ulih menang UPP ungkup Parlimen Sibu besemaya naka ulih ngemujur perambu lima taun nyema diberi awak nyadi chalun ungkup Parlimen Sibu rambau Pengawa Be4pilih Besai (PRU) ti deka datai.

    “Aku mega besemaya dalam RS1, nadai ngira kita nyukung UPP, SUPP, PBB, PRS, PDP tauka DAP, semua kita enda deka dikelaung laban kita peranak Sarawak sereta peranak Sibu.

    “Tu nyadi tanggungpengawa perintah ke diatu iya nya perintah Barisan Nasional (BN). Kitai enda ulih ngelaung sebarang piak,” ku iya ke mega Chairman Komiti Servis Komuniti UPP Sibu.

    Ba lansa ke bukai Andrew Shilling dalam jaku dipansutka iya madahka, pengari rayat DUN N.53 Bawang Assan, Dato Sri Wong Soon Koh udah ngemendarka agih belanja penyampau RM2 juta dikena bejalaika bemacham projek pemansang di kandang menua Sungai Tebelian, Tanjung Bekakap, Sungai Apong enggau Sungai Melanggan kenyau ari tiga taun ke udah.

    “Ungkuo kandang menua ari Sungai Tebelian ngagai Sungai Melanggan, Dato Sri Wong Soon Koh udah ngemendarka projek pemansang penyampau RM2 juta ari taun 2015 ngagai 2017.

    “Nya kebuah peranak diatu ulih ngasaika jalai alun ti meruan, bekal ai enggau kuasa karan sereta sistem penyambung ti deras agi,” ku iya seraya madah semina Rumah Nuing enggau Rumah Changkul di Sungai Tebelian apin ngasaika bekal ai beresi.

    Iya mega madahka LPK UPP Sibu deka bebendar ngemanahka sistem parit jalai besai ari Rumah Melina, Sungai Apong ke Rumah Unjah, Sungai Melanggan dikena ngurangka penanggul jalai ampuh.

    “Datuk Andrew Wong rambau aum Komiti Servis Komuniti seruran ngemeratka pekara ngemutarka penanggul sistem parit tu ngambika alir ai pansut enggau jampat,” ku Andrew Shilling nerang.

    Berindik ari nya, iya ngarapka semua penanggul ulih diputar dalam timpuh lima taun ti deka datai. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads