Sarawak keterubah di Malaysia, rantau Asia bisi LRT hidrogen - Berita Iban Online

Header Ads

  • Baru Nyadi

    Sarawak keterubah di Malaysia, rantau Asia bisi LRT hidrogen

    TERIMA KASIH: Aziz begulai enggau Soedirman (dua kiba) nyuaka pemeri ngagai sida ke diau di RSK maya ‘program Belaian Kasih’ di Kuching, kemari.
    Penembu projek tu ila, Sarawak deka nempa nama dalam sejarah injiniring keretapi di Malaysia, rantau Asia Tenggara.

    KUCHING: Sarawak deka nyadi nengeri keterubah di Malaysia sereta mega di rantau Asia Tenggara ti ngena hidrogen dikena bejalaika Transit Aliran Ringan (LRT) ti deka digaga di mengeri besai tu.

    Chairman Kaunsil Pemansang Ekonomi Sarawak (SEDC), Tan Sri Datuk Amar Abdul Aziz Dato Husain madah, baka ti udah dibantaika Kepala Menteri, Datuk Patinggi Abang Johari Tun Abang Openg, iya dekaka langgur projek LRT nya mungkur bagi menua Kuching, Samarahan enggau Serian.

    “Diatu, nya (Projek LRT) agi ba renggat pun pansik ke alai pekara pekara pejalai LRT ti nyambung ari bagi menua Kuching, Samarahan enggau Serian benung dipansik. Kitai melabaka pansik (pengepun) tu deka tembu dalam timpuh dua bulan agi.

    “Pengudah nya, baru mih pansik silik dikena nentuka rega, penerang trafik enggau baka ni nya deka digaga nitihka peneka Kepala Menteri kitai.

    “Enggau penembu projek tu ila, aku tau madah Sarawak deka nempa nama dalam sejarah injiniring keretapi di Malaysia sereta mega di rantau Asia Tenggara laban nyadi nengeri keterubah ti ngena LRT bekuasa hidrogen,” ku iya.

    Iya mansutka jaku nya lebuh ditanya pengarang berita pasal penerang ke pemadu baru sentang perambu projek LRT di Sarawak pengudah bejadika ‘Program Belaian Kasih Bersama warga Rumah Seri Kenangan (RSK)’ di sebuah hotel tebilang ditu, kemari.

    Bisi 30 iku orang diau di RSK dirami maya program nya beserimbai enggau pengerami ngintu Hari Krismas ke mega digulu Menijar Besai SEDC, Soedirman Aini.

    Ditanya bekaul enggau ungkus ngaga LRT nya, ku Aziz, nya apin ulih ditetapka laban agi mayuh pansik patut dipejalai sereta diperati.

    “Taja pia, pekara ke nyata, projek LRT tu nyadi projek perintah nengeri enggau SEDC ke megai tanggungpengawa nyadi pemain besai ba pengawa bejalaika projek tu,” ku iya.

    Nitih ku iya, projek LRT tu deka disikap enggau Servis Bas Henti-Henti (BRT), teksi enggau kereta ngatika kediri kelimpah nyediaka pejalai khas ungkup bala penguna ensikal enggau orang ke bedarat.

    “Ba timpuh panjai, projek LRT bekuasaka hidrogen tu mega deka mungkur kandang menua Bau, Lundu sereta Sematan seriris enggau pengawa kitai meri pemaik ngagai peranak menua tu sereta mega sektor dagang temuai di nengeri tu,” ku iya.

    Dulu agi ari nya, Aziz dalam jaku dipansutka iya, program Belaian Kasih begulai enggau orang ke diau ba RSK iya nya insiatif ti dipejalai di baruh program tanggungpengawa rama korporat (CSR) SEDC.

    “Program tu udah dipejalaika SEDC kenyau ari taun 2011 lalu taun tu nyadi taun ketujuh kitai ngerami sida ke diau di RSK ba program ke baka tu,” ku iya.

    Iya ngarapka pengawa ngatur program tu ulih nambahka agi pengaga enggau pengelantang ngagai sida kelebih agi maya ngintu Krismas ila.

    Berebak enggau nya Aziz mega bisi nyuaka pemeri khas barang dikena ninting hari ngagai sida nya. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads