Sarawak patut bisi sebuah palan sakit riman - Berita Iban Online

Header Ads

  • Baru Nyadi

    Sarawak patut bisi sebuah palan sakit riman

    Datuk Dr Sim Kui Hian
    KUCHING: Sarawak begunaka palan sakit riman ngambika orang ti sakit riman ditu enda ke Semenanjung Malaysia ngulih servis berubat sakit nya.

    Berindik enggau nya, Menteri Opis Kunsil Kandang Menua enggau Pengawa Berumah Datuk Dr Sim Kui Hian ba aum parlimen bedau lama tu tadi bisi merambu ngagai Perintah Besai nirika palan sakit riman di Sarawak.

    Maya ke diatu ku Dr. Sim, Sarawak semina bisi unit mit ti ngenah pekara ke bekaul enggau Onkologi.

    “Kitai begunaka siti palan penyakit riman lalu ukai siti unit mit. Ketegal nya aku merambu ba parlimen ngambika Sarawak bisi sebuah palan sakit riman.

    “Riman sebengkah penyakit ke nyadi pemunuh lumur dua di Malaysia enggau Sarawak. Perintah patut berundingka pemesai tanah kitai Sarawak lalu ukai pemayuh peranak ke nguan nengeri tu ba atur nirika palan sakit riman,” ku iya.

    Iya mansutka jaku nya pengudah bejadi Annual Scientific Congress of Malaysian Oncological Society (ASCOMOS) 2017 di sebuah hotel ditu, kemari.

    Nengah perambu nya Dr Sim madah palan sakit riman manah didiri besemak eng­gau Palan Sakit Tungkul Ati Sarawak di Kota Samarahan.

    “Di Semenanjung Malaysia, sida ulih deriba terus ngagai Palan Sakit Riman Putra Jaya tang di Sarawak, kitai enda ulih deriba kin, kitai meseti terebai,” ku iya.

    Dr. Sim ngarap perintah Besai berundingka perambu nya enggau berat lalu nirika palan sakit riman di nengeri tu enggau lengkas.

    Nitihka penerang iya, Sarawak diatu ngembuan mayuh orang ti bepenau sentang pekara nya lalu semina nganti Putra Jaya nirika palan ke dipinta.

    Ku iya, Sarawak diatu udah bisi lima iku Onkologis lalu sida tu chukup ngintu orang sakit riman ditu.

    “Ba pekara Onkologis kitai udah bisi, lalu semina nganti perintah nyendiaka palan ditu,” ku iya nambah.

    Nyempulang iya ba aum kemari, Presiden Gerempung Onkologi Malaysia, Dr Matin Mellor ti madah standard siku onkologi ngagai orang sakit iya nya ba ratio 1:100,000.

    Reti nya ba tetiap sejuta iku orang kitai begunaka 10 onkologis, tandu Dr Sim.

    Sepenemu enggau Dr Sim, Dr Matin pechaya tu mih maya Sarawak bisi palan sakit riman kediri empu ngambika ulih nangkup pinta servis berubat peranak nengeri tu ke ngidap sakit nya.

    Enti palan nya diri di Sarawak ku Dr Matin, palan ukai semina meri servis berubat ungkup Mengeri Kuching aja tang ungkup serata Sarawak.

    “Orang sakit ari Sibu enggau pelilih bukai ulih datai ke Kuching ari ti terebai ke Semenanjung Malaysia,” ku iya. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads