Header Ads

  • Berita Tebaru

    Sarikei Agro Digital Village deka meri pemaik ngagai komuniti

    Datu Len Talif Salleh
    SARIKEI: Sarikei Agro Digital Village ti dipejalaika DUBS nyadi siti pelasar ungkup komuniti ditu mantaika bemacham asil, produk enggau aktiviti bekaul enggau industri betanam betupi.

    Menteri Muda Perambu Mengeri, Pengatur Tanah enggau Rampa Menua, Datu Len Talif Salleh madahka, program ke bansa tu mega nyadi pelasar enggau awak ngagai raban orang dagang ti ngaul diri ba sektor betanam betupi ngelakuka produk sida.

    “Naka diatu, pemansang di kandang mengeri enggau menua pesisir di Sarikei majak ngerembai sereta mansang.

    “Mayuh begunan dagang didiri, kelimpah begunan opis enggau gempung baru ngerembai, sereta projek mit menua pesisir ari perintah enggau bantu skim pemansang runding mensia chakah dipejalai enggau tuju ngerichahka agi aktiviti ekonomi rama di kandang menua tu.

    “Apin lama ke udah, Kepala Menteri Sarawak mega bisi ngelanchar enggau bejadika Palan Inovasyen Sarikei (SIC) ti deka ngemai pemansang digital ekonomi di Sarawak enggau Sarikei, tuju iya mantu raban pedagang ngemesaika makit produk sida enggau perengka guna Teknologi Pemadah (IT) ti muntang agi sereta majak dikerindu komuniti maya ngatur pengawa,” ku Len.

    Iya mansutka jaku nya lebuhka Pengawa Ngelanjarka Pesta Nanas enggau Buah Sarikei 2017, di SIC, apin lama ke udah.

    Pesta Nanas enggau Buah Sarikei udah diatur pengelama semilan hari, berengkah ari 18 November nyin tadi lalu tembu 26 November (Hari Minggu), kemari.

    Bemacham aktiviti udah diatur sepemanjai atur pesta ti nyengkaum pemansang rama, pemansang pelajar, pemansang ekonomi, pengelandik, pengerai enggau jasmani, main asal, pengawa pemerindang enggau mayuh aktiviti ke bukai.

    Nitih ku Len, pengawa ngatur Pesta Nanas enggau Buah Sarikei taun tu udah nyapit tagit enggau batang tuju ngatur iya.

    Len ke mega nyadi Kaban Kunsil Nengeri (ADUN) Kuala Rajang mega madahka, Pesta Nanas enggau Buah Sarikei Renggat Ke-14 tu udah mujur nyadi pelasar ti tegap dikena ngempung rayat pupu bansa, pechaya enggau penatai asal di Bagi Menua Sarikei.

    Berebak enggau pengawa nya mega, ku Len, sistem bebayar nengah online, ‘Sarawak Pay’ dipelaba ngemuntang semua pengawa bebayarka servis perintah enggau rayat, kelebih agi sida ke diau di menua pesisir.

    “Dikena ngemansangka Sarikei nyadi ‘Food Basket of Sarawak’ enggau ‘Digital Hub’, iya ukai semina bepanggai ba pekara kualiti, produktiviti enggau pekara ke bukai aja, tang mega pemadu beguna iya nya produk nya ulih diterima pengguna.

    “Ba pekara tu mih ekonomi digital bejalaika pangku pengawa iya enggau pengawa ngiga makit sereta ni naka ulih gawa matak peminta ba produk, nengah strategi makit ti ulih matak pengguna,” ku Len nandu nyemetak.

    Dulu agi ari nya, kelai batang pengawa ngelanjarka Pesta Nanas enggau Buah Sarikei sekali tu, Len udah ngelepaska 1,030 iku pesereta ‘Sarikei Unity Night Run’.

    Sama bisi datai iya nya ADUN Repok, Dato Sri Huang Tiong Sii, Residen Bagi Menua Sarikei, Mohamad Junaidi Mohidin, Sapit Residen Bahagian Sarikei, Abang Mohd Porkan sereta Pemesai Pelilih Sarikei, Christoper Ranggau. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads


    Deka nemu berita benung #Viral ninting hari: