Sediaka semua perengka guna ke diguna sebedau sistem sekula digital dipejalai - Berita Iban Online

Header Ads

  • Baru Nyadi

    Sediaka semua perengka guna ke diguna sebedau sistem sekula digital dipejalai

    Ahmah Malie
    KUCHING: Perintah patut dulu agi nyediaka semua perengka guna ke diguna sebedau sistem sekula digital dipejalai di menua tu, pia ku Presiden Gerempung Pengajar Bumiputera Sarawak (KBGS) Ahmah Malie.

    Iya madahka peminta nya digaga laban bala pengajar udah bansu enggau bemacham program ke dilangkar lalu udah dipejalai tang kesemua program nya puntan sempama baka ‘Indah khabar dari rupa’.

    “Enti sema inisiatif baru tu begunaka servis internet ti tinggi, tembuka dulu perengka guna servis internet ungkup pengawa tu,” ku iya.

    Iya ke mega Chairman Kongres Gerempung Bala Pekereja Perintah (CUEPACS) Nengeri Sarawak madahka pengawa nya beguna endar dikena nyeliahka penanggul nyadi lebuh sistem sekula digital dipejalai ila.

    “KGBS nyambut manah penerang dipansutka Sapit Menteri Besai Datuk Seri Ahmad Zahid Hamidi bekaul enggau sistem Sekula Digital ti dipejalaika di menua tu.

    “Taja pia, KGBS ngelalau perintah nembuka dulu perengka guna ti diguna sebedau sistem nya dipejalai. Kitai enggaika lebuh nya dipejalai ila, deka bisi penanggul nyadi ti ngujungka program diperanbu nya enda mujur,” ku iya.

    Ku iya nambah, sistem pelajar digital nya tentu mai jeman transformasyen pelajar ti jampat agi.

    Nya kebuah ku iya, KGBS endang ngarap ngambika perengka guna bekaul enggau program pelajar ti diperambu nya patut dulu agi digaga tembu.

    “Kebuah pia, kitai pechaya Sekula Digital, Pelajar Digital endang ungkup rebak dudi hari ngulihka penemu,” ku iya.

    Iya mansutka jaku nya ngenang penerang ti dipansutka Ahmad Zaid apin lama ke udah ti madahka inisiatif baru Sekula Digital deka dipejalai dikena ngiri rebak dudi hari ngagai penemu ti setipak enggau jeman nya.

    Menteri Dalam Menua nya madahka Malaysia patut nyingkang ke mua lalu ngalih ari sistem pelajar konvensional ngagai pelajar digital dikena napi pemar revolusyen ekonomi enggau industri ti dipejalai ari empas teknologi digital.

    Nitih ku iya, software interaktif digital deka nyadi medium belajar ti manah ba pelajar moden sereta mega media belajar bestari.

    Ku Ahmad Zahid, berindik ari nya endang patut Opis Menteri Pelajar ngaluska agi pekara pelajar enggau sekula digital tu.

    Ku iya, entara batang pekara ti patut diperati iya nya bekaul enggau pengerembai runding kreatif enggau lateral nembiak mit.

    “Kitai patut ngerami pengerindu ba mayuh bengkah tu lalu penau ke bisi ari ada ba sida,” ku iya. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads