Sitak Demak Laut mengkang dijaga sereta dikemata ari penyakit denggi - Berita Iban Online

Header Ads

  • Baru Nyadi

    Sitak Demak Laut mengkang dijaga sereta dikemata ari penyakit denggi

    Denggi
    KUCHING: Pengawa ngintu sereta ngemata Palan Komersil Demak Laut beresi ari penyakit Denggi majak dipejalai.

    Palan komersial tu kala dikelai nyadi sitak balat nyadi kes sakit denggi taun siti nyin kemari, alai 18 kes bisi nyadi enggau timpuh ngintu sitak tu digaga dalam kandang 54 hari.

    Dalam taun 2017, sekali agi, penyakit denggi dikelai di sitak tu ke bisi mungkur empat kes penyakit tu taja pan, iya agi ulih dijaga.

    Bepelasar ari ‘hotspot’ tu, sitak tu dipilih nyadi sitak ngaga atur pengawa beripai besai munaska aedes peringkat negeri’ mujur dipungkal kemari.

    Sapit Direktor Opis Pengerai Menua (JKNS) (Perengka Guna Mensia Mayuh), Dr Nordin Salleh madah program beripai tu kedua kali iya digaga ditu dalam taun tu.

    Program tu betatika sitak ke napi penanggul sereta ngujungka sitak nya endur nyamuk aedes betelu.

    Entara pengawa ke digaga ngipak program nya nyengkaum ngemeresika tugung uras, meresa endur ke ditemu bisi alai nyambuk aedes betelu, ngaga pengawa ‘larviciding’, (semburan kabus) munuh nyamuk sereta meri penemu pasal pengerai sereta sekeda promosyen bukai.

    “Program beripai ke digaga seharitu (kemari) nyadi siti program ‘Strategi Lautan Biru Kebangsaan (NBOS) Opis Pengerai ke bekerejasama enggau mayuh ijinsi Perintah bukai baik di renggat Perintah Besai tauka Menua, nyengkaum komuniti ke diau di sitak nya.

    “Opis Menteri kami mega ngelalau mensia mayuh kelebih agi sida ke diau Palan Komersial Demak Laut sama enggau ngulu, ngemunas sereta nagang penyakit tu ari berampit,” ku iya.

    Iya madah munyi nya lebuh bejaku ngarika Direktor JKNS, Dr Jamilah Hashim ba program ti dipejadika Menteri Kaunsil Kandang Menua enggau Pengawa Berumah, Datuk Dr Sim Kui Hian.

    Kelimpah ari ngaga sitak Palan Komersial Demak Laut punas ari penyakit denggi nyadi baru, pengawa beripai tu mega meransang kerejasama entara ejensi dalam munaska penyakit denggi. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads