Siti kaunsil deka ditumbuh di DUN Samariang nyukung polisi KM - Berita Iban Online

Header Ads

  • Baru Nyadi

    Siti kaunsil deka ditumbuh di DUN Samariang nyukung polisi KM

    Sharifah Hasidah Sayeed Aman Ghazali
    SANTUBONG: Kunsil Nengeri (DUN) Samariang udah bisi perambu deka numbuhka siti kaunsil ti nyukung polisi Kepala Menteri Datuk Patinggi Abang Johari Tun Openg ke benung chakah ngemansangka ekonomi digital di nengeri tu.

    Menteri Muda Undang-Undang, Kaul Nengeri-Perintah Besai & Pematau Projek ti mega Ketuai PBB Pampang Samariang Sharifah Hasidah Sayeed Aman Ghazali madahka nya sebengkah chara sitak ke diarika iya meri sukung ngagai polisi ke dipejalaika kepala menteri seraya dikena muka awak sitak nya ngambi bagi dalam ekonomi digital.

    “Aku udah bisi perambu ba sitak Samariang iya nya deka numbuhka Digital Economy Action Council (Majlis Tindakan Ekonomi Digital), dikena nyambut tauka nyaup peminta YAB Kepala Menteri (bekaul enggau ekonomi digital).

    “Tang ditu aku bedau ulih madahka silik dulu nama perambu nya. Nganti dulu,” ku iya ti enggai ngenang panjai perambu ke dideka dipejalaika iya.

    Hasidah ke nyadi Kaban Kunsil Nengeri (ADUN) Samariang mansutka perambu nya lebuh dalam jaku pengelalu pengawa bejadika Mesyuarat Perwakilan PBB Pampang Samariang ke diatur ba Dewan Sunset, Damai Beach Resort ditu, kemari.

    Aum nya kemari udah mujur dipenyadika Sapit Kepala Menteri ti mega Pemangku Timbalan Presiden PBB Datuk Amar Awang Tengah Ali Hassan, lalu sama bisi ngulu pengawa bejadika aum nya chaiman tetap PBB ti mega Speaker Kunsil Nengeri Datuk Amar Mohamad Asfia Awang Nassar, Menteri Muda Pengawa berumah enggau Pengerai Mensia Mayuh Dr Annuar Rapaee sereta Sapit Ketuai PBB Pampang Samariang Tan Sri Datuk Seri Abang Khalid Marzuki.

    Nitihku Hasidah, dipelabaka urung 300 iku perwakilan PBB Pampang Samariang ari 21 ranting bisi enggau ngulu aum nya kelimpah ari bisi diatur pengawa bepilih dalam pampang nya.

    Bejaku baru iya meransang PBB Pampang Samariang ngambika terus beserakup sereta nyukung polisi ke dipejalaika kepala menteri ti mega presiden PBB.

    Iya madahka pampang Samariang siti ari pampang PBB ke nyadi pun penegap parti nya kenyau ari kelia sereta seruran chakah ngereja pengawa lebih agi tiap kali maya pengawa bepilih diatur ti ngujungka majoriti sitak Samariang nambah belama.

    “Aku minta semua mensia mayuh lebih agi kaban PBB Pampang Samariang terus beserakup sereta nyukung kuing enggau polisi presiden enggau PBB.

    “Laban kitai ulih meda dalam sitak Samariang mayuh pemansang udah dibai iya nya bisi 64 projek kenyau ari taun 2015 ngagai 2017 sereta perintah udah ngungkupka bepuluh juta ringgit ngagai sitak kitai.

    “Pemansang fizikal, infrastruktur deka seruran dibai ngagai sitak kitai jemah ila, nya alai kitai enda tau enda beserakup, anang meri peluang ngagai raban orang ke nguji ngachuk kitai,” ku Hasidah. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads