Header Ads

  • Berita Tebaru

    Sukat kelingi tanah NCR nengah inisiatif DBNA diakun perintah

    Datuk Amar Douglas Uggah
    SERIAN: Sukat kelingi tanah NCR nengah inisiatif DBNA betul lalu deka diakun perintah, ku Sapit Kepala Menteri Datuk Amar Douglas Uggah.

    Bejaku ba aum pengarang berita di Serian kemari, iya madah Opis Tanah enggau Penyukat (JTS) deka nyaup ngemujur pekara nya berengkah diatu.

    “Ngepunka atur tu, kitai (JTS) deka ngadu kereja ba dua kandang endur ke udah dulu disukat DBNA ngambi ulih nyadika chunto ungkup endur bukai.

    “Aku deka berandau enggau Dato Sri Manyin ngambi ulih netapka penyampau tanah ke udah disukat dikena mantup pinta kepala menteri ke alai iya mega minta kandang endur bukai disukat,” ku Uggah.

    Dulu agi ari nya Uggah bejadi Aum Deligit Tiga Taun Sekali Parti Pesaka Bumiputera Bersatu (PBB) pampang N.21 Tebedu di Dewan Tayung Langui Kampung Pichin ditu.

    Uggah ke mega Menteri Betanam Betupi Moden, Tanah Adat enggau Pemansang Kandang Menua nambah, inisiatif sukat kelingi DBNA deka dijadika chunto ketegal pengawa ke udah dikereja sida betul.

    Ku iya, asil sukat nya udah diberi ngagai JTS lalu kitai bisi nanya sekalika pek ke diujak nya betul tauka enda.

    “Saut sida (JTS), nadai seiti pek dipindah ari endur asal lalu reti nya sukat kelingi ke diadu DBNA nya betul.

    “Ba taun ti deka datai kitai deka nusun pelin ngambi ulih ngaga sukat kelingi ba kandang endur bukai,” ku Uggah.

    Iya mega madah model sukat kelingi DBNA nya deka diajar ngagai raban bansa bukai di Sarawak, sekalika sida ulih nguna chara ke sama.

    “Chara DBNA tu ulih ngelengkas pengawa nyukat kelingi tanah NCR lalu kitai deka dulu nentuka sekalika tanah nya tanah NCR tauka tanah perintah,” ku iya nandu.

    Dua kandang endur ke deka dulu dipansik endur ngemujur juluk ngakun tanah NCR nengah insiatif DBNA iya nya di Pichin, Serian enggau di Singai, Bau. #UtusanBorneo

    No comments

    Post Top Ad