Tunda Perbadanan Amanah Satok (PAS) dikena nyaga reta tengkira Iban - Berita Iban Online

Header Ads

  • Baru Nyadi

    Tunda Perbadanan Amanah Satok (PAS) dikena nyaga reta tengkira Iban

    Datuk Patinggi Abang Johari Tun Openg
    KUCHING: Bala pemesai Iban dilalau nunda Perbadanan Amanah Satok (ke ditumbuhka Kepala Menteri Datuk Patinggi Abang Johari Tun Openg ungkup sitak Satok) dikena nyaga reta tengkira bansa Iban di menua tu, ari reta tenggkira sida iya punas ngapa.

    Abang Johari madah,’ Gateway to Satok’ nyadi sebuah pelasar moden ke ngipak pemoden ke benung nyadi diatu.

    “Aku minta orang kampung anang sesekali nyual tanah sida. Enti sema sida iya deka ngemansangka tanah sida, tau dikemansangka ngambika reta sida iya enda betukar jari.

    “Nya alai, Satok bisi chara baru, ke dikumbai Perbadanan Amanah Satok (PAS), ke udah ditumbuhka tiga taun ke udah, lalu naka kediatu, diperatika mujur endar. Semina nganti wang turu nya nambah aja, baru PAS ulih dibuka ngagai mensia mayuh.

    “Enti saham nya untung, bisi dividen. Enti kitai begunaka duit, tau nyual saham nya lalu enti bisi duit tau mayar pulai baru, pan ‘liquid’ nya enda tau enda bisi dia,” ku iya.

    Abang Johari madah munyi nya lebuh bejaku bejadika Aum Gempuru Wakil Pergerakan Pemuda Parti Pesaka Bumiputera (PBB) pampang N8 Satok Sesi 2013-2017 (aum Tiga Taun Sekali) ke ngena jaku rambai ‘PBB Satok Mendokong Sarawak Digital) di sebengkah hotel ditu, kemari.

    Nya alai ku iya, PAS tu patut diisi dulu kelebih agi lebuh PAS tu deka nanam pukuk dalam industri methanol.

    “Methanol bisi untung laban iya deka nyadi penguntung ngagai wang turun PAS, lalu wang turu PAS ulih ditanam pukuk ba asset orang Melayu ke nanam pukuk enggau PAS.

    “Baka nya mega, komuniti Iban nanya ngagai aku, bakani ku sida iya deh? Ku aku, randau aku enggau Sapit Kepala Menteri Datuk Amar Douglas Uggah numbuhka Amanah sebaka enggau PAS, laban ari sukut numbuhka palan bansa tu, nulung rayat kitai.

    “Enti chara kita manah, kitai pan ulih nambah aset orang kitai (secara prudent sereta betatika pemerat rayat) laban pemerat kitai iya nya komuniti kitai.

    “Awakka tuai pemesai Iban nguji chara tu dulu ngena aset pemisi sida iya, ” ku iya.

    Abang Johari ti mega nyadi chairman Barisan Nasional (BN) menua tu nandu baru madahka, kebuah nyadang numbuhka Amanah tu laban enggai aset rayat menua tu (terhakis).

    “Anang reta kitai abis naya…Peda kita nama penyadi ba genturung pendiau Kpg Dagang Miri, ni tunga iya diatu? Abis magang-magang. Ni penungga Kpg Wireless di Miri? Pan sebaka, abis kedai dijual, tang orang kitai nya meh ke nyual.

    “Laban pemisi reta tu lebuh orang tuai-tuai kita nyau nadai agi, sida ke tinggal nya, bebagi reta, lalu sekeda reta tengkira nya dijual. Ni penunga Kpg Nyabor Sibu diatu? Suba bisi kedai, tang diatu nyau nadai agi, semina tinggal pendam aja.

    “Enti kitai enda betatika ekara bansa tu, bejualka reta tengkira ke diturun ulih orang tuai kelia, abis meh reta kitai nadai dikembuan agi. Nya kebuah bisi pemerat numbuhka Amanah bansa tu, ke ulih nyaga reta tengkira kita” ku iya,lalu nandu baru enggai meda reta tengkira rayat di sitak Satok abis dijual. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads