Ujan bangat, pasang raya ngujungka penusah ampuh bah di Miri - Berita Iban Online

Header Ads

  • Baru Nyadi

    Ujan bangat, pasang raya ngujungka penusah ampuh bah di Miri

    Law Poh Kiong
    MIRI: Ujan bangat ti enda ngetu diserumba kabut sereta pasang raya balat udah mai pengerusak ba sekeda endur di kandang mengeri Miri, lalu ba Batu Satu di Kuala Baram udah dituntung penusah ampuh bah kena malam Hari Dua.

    Ujan berengkah ari malam Hari Satu, apus hari Hari Dua, dataika tumu pagi kemari ngujungka raban orang berikan ke diau di Batu Satu mindahka bot sida ngagai endur ke tinggi agi, nyeliahka bot nya anyut ditabanka ai.

    Kemari, sekeda bot bisi dibai ngagai jalai Lutong-Kuala Baram lalu uras nyengkaum reba kayu bisi dipeda bekapar di atas jalai.

    Bala pekereja ari Miri City Council (MCC) mega dipeda kiruh muai uras ari Pantai Lutong nyentukka Kuala Baram.

    Jalai nya diatu ditutup ngagai mensia mayuh.

    Endur ke bukai kena pangka ujan bangat iya nya Lutong, Kuala Baram, Kampung Api-Api, Kampung Sealine, Kampung Senadin Jaya, Kampung Wireless enggau Kampung Pujut Tanjong Batu.

    Ketuai Opis Pengerara Api enggau Penyah Penusah (Bomba) Zon 6 Supt. Law Poh Kiong madahka bala iya ari dua opis ditu, Bomba Miri enggau Bomba Lopeng udah ngesah sereta gawa matau 24 jam ba penusah nyadi nyema bisi penusah ngenyit nyadi.

    “Bisi 10 iku peranak iya nya ari dua ruang bilik ti diau di Kampung Wireless udah dipindah kena malam Hari Dua, pengudah rumah sida ampuh lalu sida udah dibai ngagai Balai Miri, ngenduh dia.

    “Taja pia, sida udah dikemendar mulaika diri ke rumah pengudah tikas ai nurun tumu pagi tadi (kemari),” ku iya.

    Urung pukul 2 dini hari kemari, sebuah rumah di Pujut Tanjong Batu ditu kena pangka bah tunggal.

    Ba lansa ke bukai, di Tanjong Lobang enggau pantai Esplanade, dua buah tungkang udah anyut laban kabut.

    Taja pia, enda dikelala sapa bagi ke ngempu dua buah tungkang nya.

    Nadai sebarang penusah bebadi nyawa bisi diripotka naka ke diatu.

    Raban bekuasa bekaul deka seruran rat beratika penusah tu.

    Ngagai sida ke deka minta bantu, telefon ngagai Palan Operasyen Bah ba lumur 085-416625 tauka 085-416636 tauka telefon ngagai Palan Bantu Bah Miri ba lumur 085-411841. #UtusanBorneo

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads